Pas dy humbjeve të njëpasnjëshme, Los Angeles Lakers është rikthyer te fitorja.

Skuadra nga Kalifornia, para tifozëve të vet ka triumfuar kundër New Orleans Pelicans me tetë pikë diferencë 112-104.

LeBron James ishte fantastik në këtë përballje duke arritur ‘Triple Double’, me 22 pikë, 14 asistime e 12 kërcime.

Kyle Kuzma ishte më efikasi me 23 pikë e tre kërcime, ndërsa i rikthyeri Brandon Ingram shtoi 18 pikë të tjera.

Në mungesë të qendrave McGee dhe Tyson Chandler, për Lakers nga minuta e parë luajti kroati i ri Ivica Zubac që shkëlqeu me 16 pikë e 11 kërcime.

Fitore ka shënuar edhe San Antonio Spurs para tifozëve të vet duke mposhtur Minnesotta Timbervolwes me 26 pikë diferencë, 124-98.

Forbes me 22 pikë e shtatë asistime ishte më efikasi në këtë takim, ndërsa me lojë të mirë u dallua edhe Marco Belinelli që shtoi 17 pikë të tjera.

Për San Antonion, fitorja ndaj Minnesotas ishte e treta radhazi dhe e 18-ta këtë edicion.

Lideri i Konferencës së Lindjes, Toronto Raptors ka shënuar një fitore të radhës, pasi para adhuruesve të vet ka mposhtur Cleveland Cavaliers 116:110.

Kawhi Leonard ishte fantastik duke shënuar 37 pikë, ndërsa anglezi Anunoby OG shtoi 21 të tjera në këtë triumf të Torontos. /Telegrafi/

Rezultatet:

Los Angeles Lakers – New Orleans Pelicans 112-104

San Antonio Spurs – Minnesotta Timberwolves 124-98

Toronto Raptors – Cleveland Cavaliers 116-110

Brooklyn Nets – Indiana Pacers 106-114

Boston Celtics – Milwaukee Bucks 107-120

Chicago Bulls – Orlando Magic 90-80

Portland Trail Blazers – Utah Jazz 90-120

Sacramento Kings – Memphis Grizzlies 102-99

Charlotte – Detroit Pistons 98-86