Klopp zbulon emrat e katër lojtarëve të vetëm të Liverpoolit që patën paraqitje solide kundër Man Cityt

Trajneri i Liverpoolit, Jurgen Klopp ndihet i dëshpëruar me humbjen 4-1 nga Manchester Cityt, teksa ka pohuar se vetëm katër nga lojtarët e tij bënë një paraqitje solide.

Reds udhëtuan në Etihad të shtunën për ndeshjen e tyre të parë në Ligën Premier që nga pushimi ndërkombëtar.

Mohamed Salah kaloi Reds në epërsi 1-0 brenda 20 minutave në Etihad, por Julian  Alvarez shënoi golin e barazimit gjatë pjesës së parë.

Golat e Kevin De Bruyne, Ilkay Gundogan dhe Jack Grealish në pjesën e dytë siguruan tre pikë vendimtare për Cityn në garën e titullit të Ligës Premier me Arsenalin.

FULL-TIME | It's good to be back! 🙌

🔵 4-1 🔴 #ManCity pic.twitter.com/L742pgPegf

— Manchester City (@ManCity) April 1, 2023

Liverpooli është i teti në Ligën Premier dhe mbetet shtatë pikë larg vendit të katërt me 11 ndeshje të ligës për t’u luajtur deri në mbyllje të sezonit.

Reds janë pa fitore në dy ndeshjet e tyre të fundit në kampionat, me Liverpoolin që pësoi një humbje befasuese 1-0 nga Bournemouth përpara pushimit ndërkombëtar.

Ekipi nga Anfield, i cili gjithashtu u eliminua nga Liga e Kampionëve nga Real Madridi, nuk ka fituar asnjë ndeshje që nga demolimi i tyre 7-0 ndaj Manchester United në fillim të marsit.

Duke folur pas ndeshjes së Cityt, Klopp zbuloi se vetëm katër nga lojtarët e tij bënë një paraqitje adekuate dhe la golashënuesin Salah jashtë zgjedhjeve të tij.

“Ne kishim rreth katër paraqitje që ishin në rregull: dy mesfushorët, Henderson dhe Fabinho, punuan shumë dhe u përpoqën të mbyllnin boshllëqet. Gakpo, veçanërisht në posedim, dhe Alisson natyrisht”, ka thënë Klopp pas ndeshjes. /Telegrafi/