Gjesti që do ta largojë Hazardin nga Chelsea (Foto)

Vetëm një vit më parë Eden Hazard ishte në majën e botës, kampion me Chelsean, mbret i asistimeve në Ligë Premier dhe ylli i kombëtares së Belgjikës, që tashmë është e para në renditjen botërore të FIFA-s.

Në fillim të sezonit Jose Mourinho kishte thënë: “Ronaldo e Messi më të mirët në botë? Në nivelin e tyre është edhe Hazard”.

Fjalë që duken si mallkim, sepse tashmë situata ka ndryshuar totalisht. Hazard është kthyer në të padëshiruar për tifozët e Chelsea, të zhgënjyer tmerrësisht nga një lojtar që është zhdukur pikërisht kur klubi kishte nevojë për të.

Në ndeshje e mëdha Hazard ka luajtur keq dhe shpesh ka kërkuar zëvendësim për lëndime, duke ngritur jo pak dyshime, ndërkohë që të mërkurën ndaj PSG-së erdhi edhe kulmi.

Sapo mbaroi pjesa e parë, Hazard vrapoi te Di Maria, duke ndërruar fanellën me të, një gjest që ka bërë xhiron me rrjeteve sociale dhe ka tërbuar tifozët e Chelseat, që prisnin të paktën që një gjest i tillë të kryhej kur të mbaronte takimi.

Në këtë mënyrë, “tradhtari” nuk ka më vend në “Stamford Bridge” dhe në verë Chelsea do ta shesë, pak rëndësi kujt, mjafton që oferta të jetë e mjaftueshme.