Formacioni më i mirë në Superligën e Kosovës për javën e 17-të

Superliga e Kosova e ka mbyllur edhe javën e 17-të ku nuk kanë munguar ndeshjet derbi dhe rezultatet befasuese.

Në kryendeshjen e kësaj jave, Prishtina e ka mposhtur si mysafir Gjilanin me rezultat 3-0.

Me të njëjtin rezultat ka fituar edhe Drita si mysafir ndaj Drenicës.

Ballkani e ka mposhtur Trepçën ’89 me rezultat 2-0, ndërsa Feronikeli ka fituar kundër Besës (3-0).

Llapi e ka befasuar Arbërinë duke e mposhtur si mysafir me rezultat 2-1.

Telegrafi ua sjell më të mirët në secilën pozitë për këtë javë.

Portier

Në portë është gardiani i Dritës, Leutrim Rexhepi, që në mungesë të Faton Malokut është duke bërë paraqitje mjaftë të mira.

Ai në Skenderaj e mbajti portën e paprekur, duke bërë disa pritje mjaftë të rëndësishme.

Mbrojtja

Faza e mbrojtjes vjen me tre. Në të djathtë është Ardian Limani, që bëri paraqitje shumë të mirë ndaj Drenicës, duke dhënë edhe dy asistime në fitoren 3-0.

Në qendër është Leotrim Bekteshi, që si kapiten në ndeshje ndaj Gjilanit, u paraqit shumë mirë, duke fituar pothuajse çdo duel ndaj sulmuesve gjilanas.

Në të majtë është Elvis Prençi i Llapit, që shënoi golin e parë në ndeshje ndaj Arbërisë, në stilin e sulmuesit.

Mesfusha

Mesfusha vjen me katër lojtarë. Edvin Kuç i Ballkanit është në qendër, pas paraqitjes së mirë ndaj Trepçës ’89, duke shënuar edhe gol. Më të në krahë është Argjend Malaj që u kthye nga suspendimi me gol.

Në krahë është Almir Ajzeraj i Dritës që shënoi ndaj Drenicës, ndërsa në krahun tjetër ka zënë vend Gauthier Mankenda që ishte enigmë e pazgjidhur për mbrojtjen e Gjilanit me depërtimet e tij.

Sulmi

Reparti i sulmit vjen me tre. Kastriot Selmani në të djathtë, pasi shënoi gol të bukur ndaj Arbërisë dhe bëri një paraqitje shumë të mirë në përgjithësi.

Në të majtë Adem Maliqi, që shënoi gol ndaj Besës dhe shkëlqeu me depërtimet e tij.

Në krye të sulmit është Leotrim Kryeziu i Prishtinës, që po vazhdon me gola, duke e mbajtur skuadrën e tij në kontakt me skuadrat e kreut.

Trajner

Për trajnerin e javës edhe pse kishte dilema mes Ardian Nuhiut dhe Zekirija Ramadanit, epiteti i më të mirit i takoi këtij të fundit.

Skuadra e tij fitoi në një terren shumë të vështirë si ai në Gjilan, duke e limituar skuadrën vendase në pak raste shënime. /Telegrafi/