Fabregas: Hazard mund ta fitojë Topin e Artë te Real Madridi

Cesc Fabregas ka folur për yllin e Chelsea, Eden Hazard, i cili sipas tij mund të fitojë Topin e Artë pas transferimit te Real Madridi.

Hazard shënoi një dygolësh dhe shtoi një asistim në fitoren e Chelsea 4-1 ndaj Arsenalit në finalen e Ligës së Evropës të mërkurën në mbrëmje.

E tillë ishte cilësia e performancës së tij, dhe sezoni i tij në tërësi, që Fabregas të thotë se belgu mund të fitojë Topin e Artë në Real Madrid, ku ai pritet të transferohet në javët e ardhshme.

Lexo po ashtu Hazard e konfirmon largimin: Unë e kam marrë vendimin, është një lamtumirë - gjithçka varet nga dy klubet

“Për fat të keq, unë nuk mendoj se Chelsea në këtë moment mund t’i japë atij atë që meriton”, ka thënë fillimisht Fabregas për BT Sport.

“Për sa i përket potencialit fitues, ai mund të fitojë absolutisht çdo gjë, madje flas edhe për Topin e Artë… E di që ai thotë se nuk ka menduar për këtë, por thellë ai e bën, ai me të vërtetë dëshiron të fitojë Ligën e Kampionëve”.

Lexo po ashtu Hazard konfirmoi largimin, statistikat e belgut me Chelsean - shumë trofe, gola dhe asistime

“Mendoj se aktualisht ka një limit te Chelsea dhe ai mund të shkojë shumë më lart se ky limit në një klub si Real Madridi, sepse këto klube – Real Madridi, Barcelona, tani Manchester City, Bayern Munich – gjithmonë kthehen”.

“Ata patën një sezon të tmerrshëm te Real Madridi, por do të kthehen. Nuk ka dyshim për këtë”, përfundoi mesfushori spanjoll. /Telegrafi/