Trajneri i njohur i xhudos në Kosovë, Driton Kuka, ka folur gjerë dhe gjatë në një intervistë për Federatën Botërore të Xhudos (IJF).

47-vjeçari ka folur për punën e tij të madhe që nga paslufta, por edhe për planet dhe dëshirat e tij të së ardhmes.

“Ne filluam të garojmë në IJF në 2009 nga dëshira e madhe e presidentit, Marius Vizer, i cili ishte një përkrahës i madh për ne”.

Driton Kuka kur ishte i ri (Foto: Judo/YouTube)

“Unë ndalova xhudon në vitin 1991 dhe isha vetëm 19 vjeçar, në atë kohë isha një nga më të mirët në ekipin përfaqësues, por për shkak të politikave në atë kohë, ne ndaluam pjesëmarrjen nën ekipin e ish-Jugosllavisë”.

“Pas luftës në Kosovë në vitin 1999 fillova të mbledh fëmijë nga rrugët që jetonin rreth ‘dojo’ (vendi ku ushtrojnë xhudistët), e cila është në pronën e familjes tonë, e ndërtuar nga dashuria për xhudon”.

Një pjesë e skuadrës së vajzave (Foto: Judo/YouTube)

“Qëllimi im fillestar ishte t’i mbaja ata të angazhuar në sport pasi ju e dini, fëmijët kanë dëshirë të udhëtojnë. Në fillim i dërgova në disa gara përreth dhe ata ishin të lumtur me udhëtimet dhe që arritën të njohin fëmijët nga vendet tjera”.

“Pas tre apo katër vitesh isha i bindur që ata do të qëndrojnë në xhudo, sepse xhudo është sport i atillë. Pastaj ata filluan të fitojnë disa medalje, por gjëja kryesore ishte t’i mbajmë të angazhuar dhe ja ku jemi”.

Majlinda Kelmendi dhe Driton Kuka në prapavijë (Foto: Judo/YouTube)

“Majlinda ishte person i jashtëzakonshëm, gjatë gjithë kohës ishte e fokusuar. Në jetën reale është e qetë, kureshtare dhe pasi shkuam në gara e kuptova që ajo është luftëtare e vërtetë. Puna me atë është diçka e mirë, një personazhe si Majlinda mendoj se nuk është lehtë të gjendet”.

Driton Kuka takon shokun e fëmijërisë, Dukagjin Lipën: Krenar që ai ndërtoi Duan në muzikë, kurse unë Majlindën në sport Driton Kuka takon shokun e fëmijërisë, Dukagjin Lipën: Krenar që ai ndërtoi Duan në muzikë, kurse unë Majlindën në sport

“Nora Gjakova ka filluar stërvitjet në të njëjtën kohë me Majlindën dhe tani ajo është një nga atletet më të mira deri në 57 kilogramë”.

“Distria Krasniqi 48 kilogramë, në dy garat e fundit ishte në formë shumë të mirë dhe mendoj se ajo mund të jetë një nga kandidatet për medalje olimpike”.

Akil Gjakova duke iu gëzuar një prej sukseseve të tij (Foto: Judo/YouTube)

“Akil Gjakova e filloi vitin 2018 mjaft mirë, fitoi të artën në Grand Slamin në Paris, që është një nga garat më të mira”.

“Le të themi tani që kam katër atletët më të mirë që janë në një nivel mjaft të lartë. Ata janë mjaft të motivuar për të bërë krenarë vetën, familjen, trajnerin, komunitetin e xhudos në Kosovë dhe po ashtu gjithë vendin”.

“Shpresoj që tani qeveria të fillojë të ndërtojë Qendrën Kombëtare të xhudos, do doja të mbledhja fëmijë edhe nga qytetet tjera dhe të bëjmë një bazë më të mirë, ku do të kishim 20 apo 30 atletë të mirë. Në atë rast mendoj se Kosova do të ishte e fortë në hartën e vendeve elitë të xhudos”, ka thënë Kuka. /Telegrafi/