Bayerni vuan, por fiton në fund (Video)

Bayern Munich ka arritur një fitore tejet të vështirë nga udhëtimi në Ingolstadt.

Deri në fund të ndeshjes rezultati ishte i barabartë 0-0, por në dy minutat e fundit bavarezët shënuan dy gola për fitoren e 15-të këtë edicion në Bundesliga.

Bayerni dominoi në pjesën e parë, duke krijuar disa raste të mira shënimi.

Thiago Alcantara pati dy goditje në drejtim të portës por që u ndalën nga portieri vendas.

Rast të mirë pati edhe sulmuesi polak, Robert Lewandowski por pasi dërgoi topin mbi portierin, nga vija fatale e largoi mbrojtësi Matip.

Një tjetër rast të mirë shënimi e pati edhe Thomas Muller në pjesën e dytë, por nga vija fatale topin e largoi ylli i Kosovës, Florent Hadergjonaj.

Kampionët në fuqi të Bundesligas, golin e parë e arritën në minutën e 90-të të ndeshjes.

Ishte mesfushori kilian, Arturo Vidal që shënoi nga afërsia për 0-1.

Vetëm një minutë më vonë, Arjen Robben realizoi golin e dytë dhe të fitores për Bayernin.

Ylli kosovar, Florent Hadergjonaj, pati një paraqitje mjaftë të mirë në këtë takim.

Pas kësaj fitore, Bayern vazhdon kryesimin në Bundesliga me 49 pikë të tubuara, shtatë më shumë se ndjekësi RB Leipzig.

Ndërkohë, Hamburgu është përkujdesur për befasi, pasi ka mposhtur në shtëpi RB Leipzigun me rezultat 0-3.

Mërgim Mavraj shkëlqeu në këtë takim, ndërsa golat për mysafirët u shënuan nga Papadopoulos, Walace dhe Aaron Hunt.

Borussia Dortmund është mposhtur në udhëtim tek Dramstadt me rezultat të ngushtë 2-1. /Telegrafi/