Arteta flet për gjendjen e Salibas dhe Xhakës, ka disa fjalë edhe për përballjen me Cityn

Arsenali do të përballet me Manchester Cityn në udhëtim në kuadër të ndeshjes së sezonit në Ligën Premier.

Londinezët aktualisht janë lider në Ligën Premier me 75 pikë, pesë më shumë se City në vendin e dytë, por që skuadra e drejtuar nga Pep Guardiola ka dy ndeshje më pak të zhvilluara.

Megjithatë para përballjes të së mërkurës mbrëma, trajneri Mikel Arteta është në telashe të mëdha pasi i mungojnë dy lojtarët kryesorë, Granit Xhaka dhe William Saliba.

Në fakt ende nuk është e qartë nëse dyshja do të paraqiten të mërkurën mbrëma në Etihad, pasi janë të lënduar dhe vazhdon të jetë e paqartë nëse do të luajnë.

Trajneri i Arsenalit, Mikel Arteta ka folur për situatën momentale të dy futbollistëve të tij.

“Saliba nuk është përmirësuar, mbetemi në pritje. Por, për momentin nuk është në gjendje për të luajtur, por e përgatisim këtë ndeshje pa atë. Sa i takon Xhakës, edhe ai mbetet në pikëpyetje. Për ne do të ishte një mungesë e rëndësishme”, tha Arteta.

Tutje trajneri spanjoll foli edhe për kundërshtarin e radhës Man Cityn, ku pritet të jetë një duel vendimtar.

“Për mua kjo nuk është ndeshja që vendos sezonin, por është një sfidë dhe është nga ato sfidat e vështira që mua më pëlqejnë. Do të luajmë në fushën e tyre, por do të mundohemi të fitojmë. Nëse duam të jemi kampionë, atëherë duhet t’i mundim të gjithë”.

“Le të mbetemi të fokusuar tek fuqitë tona dhe t’iu shkaktojmë atyre probleme. Nuk mund t’iu lejojmë hapësira sepse skuadrat e mëdha të ndëshkojnë në rastin e parë. Por, po punojmë në lidhje me pikat e tyre të dobta dhe të forta. E dimë se kush janë dhe skuadra e Manchester Cityt nis që nga portieri, na duhet të jemi shumë të fokusuar dhe t’iu përshtatemi”, u shpreh Arteta.

Krejt në fund trajneri spanjoll foli edhe për sulmuesin norvegjez Erling Haaland i cili është rreziku kryesor i Topçinjve.

Lexo po ashtu Është një finale për titullin, Guardiola: E dua stadiumin e mbushur tre orë para ndeshjes

“Haalandin nuk e krahasoj me askënd, ai të bën dëm sepse është një sistem i gjithë që është në funksion të tijin. Ka shumë lojtarë të mirë që e rrethojnë dhe mënyra më e mirë për ta ndalur është që të mos lejojmë të shërbehet nga shokët e skuadrës”, u shpreh Arteta. /Telegrafi/