Trajneri i Juventusit, Massimiliano Allegri ka thënë se Angel Di Maria do të jetë në dispozicion kundër Spezias , por nuk do të startojë, ndërsa sipas tij Paul Pogba ende nuk është gati.  

Bianconerët presin nesër Spezian në “Allianz Stadium”. Di Maria do të kthehet në skuadër, por Allegri tha se argjentinasi nuk do të startojë.

“Nuk kam vendosur ende për formacionin. Nicolò Fagioli dhe Angel Di Maria janë në dispozicion, nesër do të vendos. Ne humbëm katër pikë ndaj Sampdorias dhe Romës, kështu që nesër duhet ta kompensojmë absolutisht”, ka thënë Allegri.

Di Maria shënoi dhe dha një asistim në ndeshjen hapëse të Serisë A të këtij sezoni kundër Sassuolos, ku pësoi një dëmtim në të njëjtën ndeshje.

Reklama
Reklama

“Duhet të zgjedh formacionin më të mirë për t’u përballur me Spezian. Do të jetë një lojë e vështirë. Është e lehtë të luash mirë me Romën pas një ndeshjes zhgënjyese 0-0 me Sampdorian”, ka deklaruar Allegri.

“Pogba nuk është në dispozicion për momentin. Nëse gjithçka shkon mirë, ai do të fillojë të vrapojë nga java e ardhshme, duke shpresuar që të kthehet sa më shpejt. Ai është një lojtar vendimtar për ne”, deklaroi Allegri. /Telegrafi/