Zyrtare: Pas Contes, Tottenhami i ndanë rrugët edhe me Cristian Stellinin

Vetëm disa javë pas ndërprerjes së kontratës me Antonio Conten me pëlqim reciprok, Tottenham Hotspur ka shkarkuar gjithashtu trajnerin e përkohshëm Cristian Stellini.

Vendimi u mor pas disfatës së djeshme poshtëruese 6-1 ndaj Newcastle United.

“Performanca e së dielës kundër Newcastles ishte krejtësisht e papranueshme. Ishte shkatërruese për të parë. Ne mund të shohim shumë arsye pse ndodhi dhe ndërsa unë, bordi, trajnerët dhe lojtarët duhet të marrin të gjithë përgjegjësinë kolektive, në fund të fundit përgjegjësia është e imja”, shkroi kryetari Daniel Levy në faqen e internetit të klubit.

Lexo po ashtu Hugo Lloris reagon për zëvendësimin pas pjesës së parë në humbjen turpëruese nga Newcastle

“Cristian do të largohet nga roli i tij aktual së bashku me stafin e tij. Cristian u fut në një pikë të vështirë të sezonit tonë dhe dua ta falënderoj për mënyrën profesionale në të cilën ai dhe stafi i tij stërvitor janë sjellë gjatë një kohe kaq sfiduese. I urojmë mirë atij dhe stafit të tij”.

“Ryan Mason do të marrë përsipër detyrat e trajnerit me efekt të menjëhershëm. Ryan e njeh mirë klubin dhe lojtarët. Ne do të përditësojmë më tej për stafin e tij stërvitor në kohën e duhur”, ka shtuar më tej Levy.

Kjo ishte vetëm puna e dytë që Stellini kishte mbajtur si trajner, duke kaluar pjesën më të madhe të karrierës së tij si ndihmës strateg i Contes në Siena, Juventus, Inter dhe Spurs. /Telegrafi/

Club update from Daniel

— Tottenham Hotspur (@SpursOfficial) April 24, 2023