Shpërthen zjarr i madh në qytetin e Kampionatit Botëror – aty ku gjendet fshati i tifozëve

Një zjarr i madh ka shpërthyer në qytetin e Kampionatit Botëror, Lusail në Katar, me një tym të zi që u ngrit në qiell pikërisht pranë një prej fshatrave të tifozëve.

Tymi kishte përfshirë edhe fshatin e tifozëve, të quajtur “Qetaifan Island North”, dhe mund të shihej edhe nga kryeqyteti i Dohas.

Zyrtarët thanë se zjarri shpërtheu në një ndërtesë në ndërtim në qytet.

Autoritetet kërkuan nga fansat dhe banorët të ishin të qetë në një postim në Twitter të postuar pak pas orës 10 të mëngjesit, por video e postuar në mediat sociale tregoi se zjarri ishte i dukshëm nga qindra metra larg.

Imazhet tregojnë fshatin, i cili përbëhet nga tenda, në qytetin e Lusail, në veri të kryeqytetit Doha në bregun lindor të Katarit.

Qeveria e Katarit shpenzoi miliarda paund për të ndërtuar Lusail përpara fillimit të Kupës së Botës. Mendohet se qyteti mori 40 miliardë euro investime, pjesa më e madhe e të cilave shkoi në ndërtimin e hoteleve, vendeve dhe atraksioneve turistike të reja.

Zjarri, i cili filloi pak pas mesditës me kohën lokale, u lokalizua në një ishull në Lusail rreth dy milje larg stadiumit të qytetit.

Nuk mendohet se zjarri ka shkaktuar ndonjë ndërprerje në ndeshjen, e cila do të fillojë në orën 20:00 me orën tonë.

Autoritetet thanë se Mbrojtja Civile kontrolloi një zjarr në një ndërtesë në ndërtim pa asnjë person të lënduar.

Pamjet dramatike tregojnë çatinë e një ndërtese në flakë pranë fshatit të tifozëve, por nuk është menjëherë e qartë se çfarë ishte planifikuar të ishte objekti në ndërtim. /Telegrafi/