Porsche po ndërton një fabrikë në Gjermani, ajo do të prodhojë bateri për makina elektrike

Prodhuesi gjerman i makinave Porsche ka njoftuar se, në bashkëpunim me prodhuesin e “qelizave” të specializuara të baterive litium-jon Customcells, do të ndërtojë një fabrikë në të cilën do të prodhojë në masë bateri për modele speciale të makinave elektrike.

Sipas mediave të huaja, përcjell Telegrafi, impianti duhet të ndërtohet në zonën më të gjerë të Stuttgartit dhe të arrijë një kapacitet prej 100 megavat orë në vit, që korrespondon me bateritë për njëmijë makina, njoftoi kompania të dielën.

Siç thuhet më tej, prodhimi duhet të fillojë në vitin 2024 dhe deri në vitin 2025 duhet të punësojë deri në 80 punëtorë.

Fabrika do të jetë në pronësi të Cellforce Group, të cilin Porsche themeloi me Customcells, i cili krijoi prodhimin e qelizave të specializuara të baterisë litium-jon nga Instituti Fraunhofer.

Porsche ka 83.75 për qind të aksioneve në kompaninë e re dhe pjesa tjetër është në pronësi të Customcells.

Bëhet e ditur se Porsche do të investojë pak më pak se 100 milionë euro në prodhim ndërsa projekti do të bashkëfinancohet nga të dy qeveritë federale dhe shtetërore të Baden-Wuerttemberg me rreth 60 milionë euro. /Telegrafi/