‘Përparim’ në bisedimet Izrael-Hamas ndërsa grupi ‘largoi’ disa nga kërkesat e tij

Ka pasur “progres” në bisedimet për një marrëveshje pengjesh midis Izraelit dhe Hamasit në Paris pasi grupi “hoqi disa nga kërkesat e tij”.

Kështu ka thënë një zyrtar izraelit për NBC News sipas të cilit negociatorët izraelitë janë kthyer nga bisedimet e armëpushimit me zyrtarë amerikanë, katar dhe egjiptianë në Paris.

“Ka pasur një përparim në Paris, por është shumë herët për të thënë nëse do të çojë në një përparim”, citohet të ketë thënë zyrtari.

Siç është bërë e ditur më tej, kabineti i luftës i Izraelit do të mblidhet të shtunën në mbrëmje për të diskutuar mbi negociatat dhe gjendjen e luftës.

Por fakti që negociatorët izraelitë besuan se takimi i tyre të premten me ndërmjetësit kërkonte thirrjen e seancës së kabinetit të luftës në mbrëmje “tregon se ata nuk u kthyen duarbosh”, ka thënë këshilltari i Benjamin Netanyahut për sigurinë kombëtare.

Ndërkohë, një figurë e lartë politike i tha NBC: “Ende larg nga një marrëveshje, por Hamasi hoqi disa nga kërkesat e tij pas forcimit të pozicioneve të kryeministrit Netanyahu”.

Negociatorët kanë shtuar përpjekjet për të siguruar një armëpushim në Gaza, me shpresën për të shmangur një sulm izraelit në qytetin Rafah të Gazës, ku janë strehuar më shumë se një milion njerëz të zhvendosur.

E udhëheqësi i Hamasit, Ismail Haniyeh u takua me ndërmjetësit egjiptianë në Kajro për të diskutuar një armëpushim këtë javë në vizitën e tij të parë që nga dhjetori.

Një zyrtar i Hamasit tha dje se grupi militant kishte përfunduar bisedimet e armëpushimit në Kajro dhe po priste të shihte se çfarë do të sjellin ndërmjetësit nga bisedimet e fundjavës me Izraelin.

Lajmi vjen pasi ministria e shëndetësisë e Gazës tha se numri i të vrarëve gjatë gati pesë muajve të luftës është rritur në 29,606. Numri i përgjithshëm i të plagosurve u rrit në afro 70,000. /Telegrafi/