Botë Nga Bota Evropa

Për shkak të kërcënimit rus, suedezët po regjistrohen në mënyrë masive si rezervistë ushtarakë

Para 2 muajve

Suedia po e transformon Gardën e saj Kombëtare rezervë nga një njësi që shumë e konsideronin praktikisht një hobi, në një forcë luftarake që është bërë aq tërheqëse për të rinjtë suedezë sa duhet të refuzojë aplikantët.

Arsyeja? Pushtimi rus i Ukrainës dhe besimi në rritje se Suedia duhet të përgatitet për luftë. Ky, siç shkruan Politico, është një ndryshim i madh nga dekadat e fundit në të cilat Garda Kombëtare – e cila kishte rreth 23,000 burra të regjistruar dhe shërbeu si një rezervë për ushtrinë profesionale – ra pas përfundimit të Luftës së Ftohtë, transmeton Telegrafi.

Garda Kombëtare konsiderohej si domeni i qytetarëve kryesisht të moshës së mesme, shumë prej të cilëve nuk i merrnin shumë seriozisht detyrat e tyre.

Në vitin 2001, një raport i qeverisë vuri në dukje alarm në forcat e armatosura për shkak të rënies së numrit të anëtarëve të Gardës Kombëtare.

“Kur iu bashkova, isha 21 vjeç, shumë më i ri se mesatarja. Ishte si pjesa tjetër e Luftës së Ftohtë “, tha Alexander Raaum, i cili u regjistrua në vitin 2009, rreth 18 muaj pasi kreu shërbimin e tij ushtarak në artileri.

Disa vjet pas rënies së Bashkimit Sovjetik, qeveria shfuqizoi regjistrimin pothuajse automatikisht në Gardën Kombëtare për njerëzit që kishin kryer shërbimin e tyre ushtarak.

Pezullimi i rekrutimit në vitin 2010 ishte një tjetër goditje për Gardën. Por aneksimi i paligjshëm i Krimesë nga Rusia në vitin 2014 dhe përpjekjet për të nisur një luftë separatiste në lindje të Ukrainës kanë nxitur një rishikim të gjerë të çështjeve të sigurisë në të gjithë Evropën.

Gjatë dekadës së fundit, Garda Kombëtare ka pësuar një sërë reformash që e kanë lidhur më mirë atë me degët e tjera të ushtrisë. Në vend të armëve të përdorura më parë nga njësitë e ushtrisë profesionale, gardistët tani po marrin armë të reja.

Megjithatë, deri dy vjet më parë, rekrutimi ishte i dobët dhe shumica e njësive të Gardës Kombëtare nuk i plotësuan ditët e tyre të detyrueshme të shërbimit. Në vitin 2020, 20,000 njerëz u regjistruan për Gardën, një rënie e madhe nga rreth 120,000 në mesin e viteve të 80-ta.

Gjithçka ndryshoi me pushtimin rus të Ukrainës në vitin 2022. Atë vit, 29,101 suedezë u regjistruan për të shërbyer në Gardën Kombëtare, që është 619 për qind më shumë se mesatarja e vitit. Organizatat ndihmëse suedeze të Mbrojtjes kanë parë gjithashtu një rritje të aplikimeve për anëtarësim.

Në dy javët e para të luftës, 640 persona iu bashkuan Lottas, një grup grash që ofron mbështetje logjistike për ushtrinë. Ky është afërsisht numri i anëtarëve të rinj që Lottas zakonisht merr gjatë gjithë vitit.

Deri në fund të vitit 2022, një tjetër organizatë ndihmëse, Federata suedeze për Edukimin dhe Trajnimin Vullnetar të Mbrojtjes, mori 3,795 anëtarë të rinj – nga vetëm 46 një vit më parë.

Organizata që trajnon shoferët për detyrat në mbrojtjen më të gjerë të vendit, ndërkohë ka dyfishuar numrin e anëtarëve të rinj.

Lufta gjithashtu bëri që Suedia të braktiste politikën e saj të gjatë të mos-angazhimit ushtarak dhe të aplikonte për anëtarësim në NATO, së bashku me Finlandën fqinje. Kërkesa e Suedisë është ende në pritje të miratimit të Hungarisë.

Paralajmërimet për një luftë të mundshme me Rusinë nuk po pakësohen, përkundrazi. Në javën e parë të këtij viti, politikanët dhe udhëheqësit ushtarakë suedezë u mblodhën në konferencën e tyre vjetore Populli dhe Mbrojtja me një mesazh ‘kthjellues’.

“Ne mund të shohim luftë në Suedi”, paralajmëroi ministri i Mbrojtjes Civile, Carl Oskar Bohlin.

Luftën e përmendi disa herë edhe kryeministri Ulf Kristersson.

“Një sulm i armatosur në Suedi nuk mund të përjashtohet. Lufta mund të vijë edhe tek ne”, tha ministri i Mbrojtjes, Pål Jonson.

Një ndjenjë urgjence po shtyn më shumë njerëz t’i bashkohen Gardës Kombëtare.

Në dy javët e para të janarit, rreth 1200 persona u regjistruan, katër herë më shumë se në të njëjtën periudhë të vitit 2023.

“Pesëmbëdhjetë vjet më parë, shumë njerëz e shihnin Gardën si një hobi, si ecja apo gjuetia. Tani ata e kuptojnë se është një pjesë kyçe e sigurisë sonë”, tha Raaum. /Telegrafi/