Pep Guardiola po planifikon një ndryshim radikal të taktikave për derbin ndaj Man United

Pep Guardiola ka pranuar se ai po planifikon një ndryshim radikal të taktikave pas serisë së dobët të rezultateve nga Manchester City. 

Kampioni në fuqi i Ligës Premier ka marrë vetëm një fitore në 10 ndeshjet e tyre të fundit dhe u mposhtën me rezultat 2-0 nga Juventusi në Ligën e Kampionëve. 

Ata do të rikthehen në aksion të dielën me derbin ndaj Manchester United, por atyre do t’iu mungojnë disa lojtarë. 

Guardiola do të mbetet pa shërbimet e Manuel Akanji, John Stones dhe Nathan Ake teksa Rico Lewis është i suspenduar. 

Për këtë arsye tekniku spanjoll do t’i ketë në dispozicion vetëm Kyle Walker, Ruben Dias dhe Josko Gvardiol. 

Sidoqoftë, ai njihet për zgjidhje të problemeve dhe në konferencën për shtyp para kësaj ndeshje, ai ka thënë se mesfushori Matheus Nunes mund të luajë në mbrojtje. 

Lexo po ashtu Guardiola zbulon çrregullimet për shkak të formës së dobët të Man City

“Ndaj Unitedit ndoshta Matheus Nunes mund të luajë mbrojtës krahu ose ndoshta në qendër me pesë mbrapa. Jam duke menduar”, ka thënë Guardiola. 

Ish-trajneri i Barçës ka marrë në të kaluarën disa vendime të çmendura dhe aktivizimi i Nunes në fazën defanzive mund të bëhet njëri prej tyre./Telegrafi/