Mancini ka këndellur Italinë, tani kërkohet nga dy klubet të mëdha evropiane

Sipas raportimeve nga Italia, Roberto Mancini, po monitorohet nga PSG dhe Manchester United, por në anën tjetër FIGC dëshiron t’ia zgjasë kontratën si përzgjedhës i Italisë.

Marrëveshja aktuale e Mancinit me Italinë përfundon pas Kupës së Botës 2022, por presidenti i FIGC, Gabriele Gravina, ka zbuluar se dëshiron të ulet dhe të diskutojë një kontratë të re me ish-trajnerin e Manchester Cityt.

“Na kanë ngelur dy vjet nga kontrata, që është një kohë e gjatë, por projekti për të cilin po punojmë është afatgjatë”.

“Kështu që ne do të ulemi në kohën e duhur me Roberton dhe do të diskutojmë situatën”, kishte thënë ai përpara ndeshjes së Ligës së Kombeve të Azzurrit kundër Polonisë javën e kaluar.

Sipas Tuttosport , Mancini monitorohet nga disa klube të mëdha në Evropë.

Ai ishte lidhur me një lëvizje në Juventus verën e kaluar dhe tani PSG dhe Manchester United thuhet se janë të interesuar për të.

Mancini ka dalë pozitiv me COVID-19 dhe nuk ka qenë në krye të skuadrës në dy ndeshjet e fundit të Italisë kundër Estonisë dhe Polonisë.

E njëjta gjë do të ndodhë edhe këtë mbrëmje, ku Azzurrët do të ndeshen me Bosnjën. /Telegrafi/