Lojtarët që iu bashkuan Interit nga Milani para Calhanoglut

Hakan Calhanoglu është futbollisti i parë që i bashkohet Interit nga Milani që nga viti 2012 kur këtë e kishte bërë Antonio Cassano.

27-vjeçari do t’u nënshtrohet ekzaminimeve mjekësore të martën dhe pastaj do të nënshkruajë kontratë trevjeçare me përfitime prej pesë milionë eurosh në vit (një milion më shumë sesa ishte oferta e Rossonerëve).

Mesfushori turk largohet nga Milani pas katër vitesh, ndërsa klubi e ka konfirmuar arritjen e marrëveshjes me Nerazzurrët.

Me gjithë rivalitetin e madh të klubeve milaneze, nuk kanë munguar transferimet e ndërsjella ndër vite. Më poshtë jua sjellim disa prej emrave që ishin larguar nga kuqezinjtë në drejtim të zikaltërve:

Antonio Cassano është lojtari i fundit që e braktisi Milanin për Interin në vitin 2012. Ish-sulmuesi italian nënshkroi për rivalin e qytetit menjëherë pasi e fitoi titullin e vetëm të Serie A.

Umit Davala, Francesco Coco, Andres Guglielminpietro, Paolo Ginestra e Drazen Brncic, janë emra që u larguan në periudhën 2001-2002 drejt Interit.

Giorgio Frezzolini (1999), Francesco Moriero (1997) e Fulvio Collovati (1982), po ashtu kishin nënshkruar për Nerazzurrët nga rivali lokal gjatë karrierës së tyre.

Moriero, një ish-futbollisti italian, asnjëherë nuk kishte luajtur për Milanin, mirëpo iu bashkua Interit në vitin 1997 formalisht nga Rossonerët. /Telegrafi/