Llapi kërkoi tri pikë në tavolinë pas humbjes nga Malisheva, Komisioni i Garave refuzon ankesën e tyre – reagon trajneri Tahir Batatina

Llapi kishte bërë ankesë pas ndeshjes me Malishevën, ku kishte pësuar humbje me rezultat 2-1, duke pretenduar se lojtari Rilind Haziraj ka luajtur me katër kartonë dhe se fitorja iu takon atyre, pasi sulmuesi nuk kishte të drejt loje.

Por, sot Komisioni i Garave i FFK-së, e ka hedhur poshtë ankesën e Llapit, pasi i ka kaluar afatet.

“Ankesa e KF Llapi hudhet poshtë si e pa afatshme dhe ndeshja e javës së 25-të, në mes të KF Malisheva – KF Llapi, regjistrohet me rezultatin e arritur në fushë 2:1 në favor të KF Malisheva”, thuhet fillimisht në njoftim.

“Komisioni i Garave në seancën e vet të mbajtur me datë 15.03.2024, regjistroi ndeshjet e javës së 25-të Albi Mall Superligës së Kosovës me rezultat të arritura në fushë, përveç ndeshjes KF Malisheva – KF Llapi, e cila pas shqyrtimit të ankesës të KF-Llapi, të ushtruar me datën 14.03.2024 dhe të taksuar-paguar me datën 15.03.2024, e hudh poshtë si të pa afatshme ankesën”.

“Komisioni i Garave gjatë administrimit të ankesës dhe të gjitha shkresave në lëndë u konstatua se për Komisionin e Garave, sipas Nenit 72, Paragrafi 2, të Regullorës së Garave për shqyrtim dhe vendim marrje, dhe: (Kur xhiro zhvillohet të dielën dhe të mërkurën, atëherë, kompletimi i lëndës së ankesës dhe taksimi-pagesa, duhet të bëhet Brenda 24 orëve nga përfundimi i ndeshjes së zhvilluar)”.

“Pasi që ankesa e KF-Llapi është ushtruar me datën 14.03.2024, kurse e taksuar-paguar me datën 15.03.2024, ndërsa ndeshja është zhvilluar me datën 13.03.2024, kështu që nuk është përmbushur neni 72, paragrafi 2 i rregullores së garave, prandaj: Ankesa e KF-Llapi hudhet posht si e pa afatshme dhe ndeshja e javës së 25-të KF Malisheva – KF Llapi, regjistrohet me rezultatin e arritur në fushë 2:1 në favor të KF Malisheva”, thuhet në njoftimin e FFK-së.

Batatina: Ligjin e bën rregullorja, jo Ballkani

Trajneri i Llapit, Tahir Batatina, ka reaguar pas refuzimit të ankesës së skuadrës së tij nga Komisioni i Garave i Federatës së Futbollit, duke thënë se ligjin e bën rregullorja e jo Ballkani.

Por trajneri i Llapit ka aluduar se në këtë vendim ka gisht Ballkani.

“Nuk ka komision që e hodh poshtë padrejtësinë. Urime Llapit 3 pikë sepse kështu po thotë rregullorja jo Tahir Batatina e Llapi. Nuk ka kritere të dyfishta sepse ligjin e futbollit e bënë rregullorja dhe jo një klub që i ka fituar dy tituj kampioni. Vazhdojmë”, ka shkruar Batatina në Facebook.

Ballkani e Llapi po luftojnë për titull kampioni të Superligës. Aktualisht, Ballkani është lider me 51 pikë, një më shumë se Llapi. Të dy skuadrat takohen të shtunën në Suharekë. /Telegrafi/