Kryeministri sllovak jashtë rrezikut për jetë

Kryeministri i Sllovakisë, Robert Fico, është jashtë rrezikut për jetë por mbetet në qëndrim intensiv katër ditë pasi u qëllua nga një person i armatosur, ka njoftuar zëvendëskryeministri sllovak, Tomas Taraba.

“Edhe pse nuk është në rrezik për jetë, gjendja e tij mbetet serioze”, tha aleati më i ngushtë i Ficos, Ministri i Mbrojtjes, Robert Kalinak.

“Ne të gjithë ndihemi më të relaksuar tani”, shtoi Kalinak.

Ministri tha se Fico për momentin do të qëndrojë në spitalin e Banska Bystrica, pasi gjendja e tij serioze nuk e lejon të transferohet në spitalin e kryeqytetit, Bratislavë.

Ndryshe, Fico 59 vjeç, u qëllua me armë teksa ishte duke u përshëndetur me mbështetësit e tij pas një takimi të qeverisë në Handlova, shkruan the Guardian, përcjell Telegrafi.

Lexo po ashtu Gjykata urdhëron paraburgimin për të dyshuarin për atentatin ndaj Robert Ficos

Siç raporton Ministri i Brendshëm i Sllovakisë, Matush Sutaj-Estok, “nëse një nga plumbat do të kishte shkuar vetëm disa centimetra më lart, do ta kishte goditur mëlçinë e kryeministrit”.

Fico deri më tani i është nënshtruar dy operimeve.

Ndërkohë, i armatosuri i dyshuar, i identifikuar si poeti Juraj Cintula, 71 vjeç, u akuzua për tentativë vrasjeje me paramendim dhe është dërguar në paraburgim.

Gjykata Speciale Penale e Sllovakisë ka urdhëruar ndalimin e tij pasi ka frikë se ai mund të ikë dhe të kryejë krime të tjera.

Bëhet e ditur se të shtënat ndaj Ficos ishin përpjekja e parë e madhe për vrasjen e një lideri politik evropian në më shumë se 20 vjet. /Telegrafi/