Konfirmohen vazot e Ligës së Kampionëve – gjithçka gati për shortin që hidhet të enjten në Monako

Vazot për shortin e fazës së grupeve të Ligës së Kampionëve 2024/25 tani janë konfirmuar pas përfundimit të fazës kualifikuese të këtij sezoni.

Të enjten (29 gusht) në orën 18:00 klubet evropiane do të zbulojnë kundërshtarët e tyre për raundin e hapjes së ndeshjeve.

Do të jetë një short i ri i Ligës së Kampionëve këtë vit, me formatin që do të ketë një rritje nga 32 në 36 ekipe.

Siç shpjegohet nga UEFA, klubet do të vendosen në katër vazo bazuar në koeficientin e tyre individual të klubit në fillim të sezonit.

Më pas, çdo skuadër do të përballet kundër dy kundërshtarëve nga secila vazo, me tetë ndeshje në total, katër si vendas dhe katër si mysafir. Në fazën e ligës, skuadrat nuk mund të përballen me kundërshtarë nga vendi i tyre.

Lexo po ashtu Formati i ri i Ligës së Kampionëve: Zbulohet se sa kohë do të marrë hedhja e shortit

Të 36 skuadrat do të tërhiqen manualisht duke përdorur topat tradicional. Për çdo ekip të tërhequr manualisht, një softuer i caktuar i automatizuar do të tërheqë rastësisht kundërshtarët e tyre, të cilët do të shfaqen në ekran në sallën e shortit dhe në televizion.

Softueri do të vendosë gjithashtu se cilat ndeshje do të jenë si vendas dhe cilat si mysafir. Shorti do të fillojë me vazon 1, duke caktuar kundërshtarët për të gjitha skuadrat, njëra pas tjetrës, dhe do të vazhdojë me vazot e tjera në rend zbritës derisa të gjitha skuadrat t’u caktohen kundërshtarët e tyre.

Dinamo Zagreb, Lille që siguroi kualifikimin falë golit të Edon Zhegrovës, Crvena Zvezda dhe Slovan Bratislava janë katër skuadrat e fundit që kanë siguruar vendin e tyre në raundin tjetër pasi kanë siguruar kualifikimin të mërkurën mbrëma.

Kështu do të duken vazot përpara shortit të së enjtes:

Vazo e parë: Real Madrid , Manchester City, Bayern Munich, Paris Saint-Germain, Liverpool, Inter, Borussia Dortmund, RB Leipzig, Barcelona.

Vazo e dytë: Bayer Leverkusen, Atletico Madrid, Atalanta, Juventus, Benfica, Arsenal, Club Brugge, Shakhtar Donetsk, Milan.

Vazo e tretë: Feyenoord, Sporting Lisbon, PSV Eindhoven, Red Bull Salzburg, Young Boys, Celtic, Dinamo Zagreb, Lille, Crvena Zvezda.

Vazo e katërt: Monaco, Sparta Pragë, Aston Villa, Bologna, Girona, Shtutgart, Sturm Graz, Brest, Slovan Bratislava. /Telegrafi/