Klitschko: Nuk do të ketë më revansh me Tyson Fury

Edhe pse po përgatitet intensivisht për duelin e 29 prillit ndaj kampionit të botës në fuqi të peshave të rënda Anthony Joshua, ukrainasi Wladimir Klitschko është rikthyer te revanshi i munguar me Tyson Fury.

Një sfidë e dytë që duhej të ishte zhvilluar gjatë 2016-së, por që u anullua dy herë për shkak të dëmtimeve të boksierit britanik.

I pyetur nëse kjo përballje e dytë mund të realizohet tani që Fury po rikthehet në ring, Klitschko ka qenë kategorik në përgjigjen e tij. “Jo, revanshi me Fury nuk do të zhvillohet ndonjëherë”, tha Klitschko nga Austria, ku dhe po stërvitet.

Më tej, ish-kampioni i botës shtoi: “As unë dhe asnjë nga stafi im, nuk duam të merremi më apo të bashkëpunojmë në të ardhmen me ata njerëz. Humbëm një vit kohë duke u marrë me fjalë dhe mos harroni se Wladimir nuk është më 18 vjeç dhe që nis sot karrierën si profesionist”, u shpreh boksieri ukrainas, tashmë 41 vjeç.

Klitschko pranoi se synon të heqë nga mendja e tij vitin e mbrapshtë 2015, kur dhe humbi titullin kampion në atë duel me Tyson Fury në Duseldorf. “Joshua është britanik si Fury, por është një boksier krejt ndryshe dhe jam i lumtur që po përballem me të”, tha Klitchko, që synon të bëhet për të tretën herë në karrierë kampion bote. /telesport/