Këngë verore, dashuri dhe ritëm në bregdet! Young Zerka flet rreth projektit të tij më të ri (Foto)

Këngëtari Young Zerka së shpejti do të publikojë projektin e tij më të ri muzikor.

Në një prononcim ekskluziv për Telegrafin, Young Zerka rrëfen detajet e këtij projekti mjaft të ri veror, i cili vjen së shpejti për publikun.

“Kënga ime e re është realizuar në ‘RedBox’ nga Big Bang të cilin e falënderoj shumë për punën dhe përkushtimin që ka pasur për të gjitha projektet e mija në fakt, ndërsa me melodinë dhe tekstin jam marrë vet siç bëj zakonisht me këngët e mija”, tha Young Zerka për Telegrafin.

Në vazhdimin e bisedës, këngëtari tregoi edhe për tematikën që do të shtjellojë kjo këngë verore, e cila me gjasë do të pritet mirë nga publiku.

“Dashuri normalisht… si çdo këngë vere, vajza të bukura, festa është një këngë që ka goxha ndjenjë dhe besoj të transmetohet sa më mirë”, tregon këngëtari.

Lexo po ashtu Serbët vjedhin këngën "Harem" të Young Zerkës (Video)

Këto ditë kanë përfunduar edhe xhirimet e klipit, të cilit janë kryer në Greqi dhe patjetër që do të sjellin një frymë verore në këtë klip.

“Gjithmonë qëllimi është të dalësh ndryshe dhe duke qenë se fluksi i prodhimeve është goxha i madh dhe paraqitja e veçantë gjithmonë e më shumë vështirësohet, ndaj këtë radhë në fakt zgjodhëm Greqinë për të xhiruar duke shpresuar që të kemi një rezultat sa më të bukur”, shprehet për Telegrafin, Young Zerka.

Vera 2017 do të jetë një sezon mjaft i ngarkuar për të gjithë estradën, ndërsa e tillë do të jetë edhe për këngëtarin, i cili përveç koncerteve do të jetë mjaft i angazhuar edhe në prurjen e projekteve të reja.

Lexo po ashtu Të gjitha lajmet nga Estrada Shqiptare

“Ky projekti nuk do të jetë i vetmi, do të jetë edhe një tjetër këngë shumë shpejt, por nuk do të them asgjë pasi dua mos ta shuaj kureshtjen e publikut. Ndërsa sa i përket koncerteve, Ishalla të kemi forcë e shëndet sa më të mirë se vera do jetë plot”, përfundoi duke qeshur Young Zerka për Telegrafin.

Klipi pritet të publikohet në fund të kësaj jave, ndërsa Telegrafi ka siguruar disa fotografi ekskluzive nga xhirimet e klipit.

Këngë verore, dashuri, ritëm dhe plazh do të jetë befasia e radhës nga Young Zerka për klipin e ri. /Telegrafi/