Juventus në bisedime të avancuara me Ramseyn për shkëputjen e kontratës

Aaron Ramsey pritet të jetë lojtari i radhës që do të largohet nga Juventusi.

Mesfushori uellsian iu bashkua gjigantit italian në verën e vitit 2019 si transferim i lirë nga Arsenali, por ai asnjëherë nuk arriti pritshmëritë.

Së fundmi Ramsey ishte i huazuar te Glasgow Rangers, por edhe në Skoci dështoi duke mos treguar asgjë, për më tepër humbi penalltinë vendimtare në finale të Ligës së Evropës.

31-vjeçari ka kontratë me Zonjën e Vjetër deri në verën e vitit 2023, por ai nuk bën pjesë në planet e Allegrit dhe Juventusi po shqyrton mundësinë që t’ia shkëpusë kontratën.

Ramsey fiton një pagë të lartë prej tetë milionë eurove në sezon dhe italianët duan të ndahen nga ai për mos ta paguar atë pagë të madhe.

Calciomercato ka njoftuar se Juve është në bisedime të avancuara me lojtarin për shkëputjen e kontratës, me Ramseyn i cili pritet të fitoj një shumë rreth katër milionë euro për një gjë të tillë.

E ardhmja e tij pritet të jetë sërish në Ishull, ku Nottingham Forest dhe Cardiff City janë dy skuadrat që kanë shprehur interesim për shërbimet e tij. /Telegrafi/