Një grup hajnash thyen xhamat e dyerve të një shtëpie në Staten Island të New Yorkut, ku më pas morën çelësat e veturës luksoze 400 mijë dollarëshe Rolly-Royce kabriolet, duke u larguar me të nga vendi i ngjarjes.

Por ata nuk shkuan edhe aq larg, pasi pronari i veturës ua prishi planin. U kyç menjëherë në kompjuter për ta ndezur sistemin e gjurmimit të veturës për t’i lokalizuar, transmeton Telegrafi.

Pronari i veturës i identifikuar vetëm si John, ishte alarmuar nga sistemi i alarmit, kur hajnat u futën brenda. Megjithatë u tregua i matur duke mos reaguar menjëherë nga frika se mund të rrezikohen familjarët.

Pasi u larguan hajnat, u kyç për ta ndezur sistemin e gjurmimit, më pas edhe atë të fikjes së motorit të veturës luksoze Rolls-Royce Dawn.

Pavarësisht përpjekjeve të shumta të hajnave për ta ndezur sërish – nuk ia arritën qëllimit. Aty intervenoi policia që shkoi te vetura dhe ia ktheu menjëherë pronarit.

Deri më tani nuk është arrestuar askush për këtë vjedhje, ndërsa pronari i saj thotë se ndihet më i qetë tani dhe se është i lumtur që nuk është lënduar askush nga familja e tij. /Telegrafi/