Hungaria vonon anëtarësimin e Suedisë në NATO

Deputetët e partisë së kryeministrit hungarez, Viktor Orban bojkotuan një mbledhje të jashtëzakonshme të parlamentit që partitë opozitare e kishin thirrur për të ratifikuar pranimin e Suedisë në NATO, raporton APA duke cituar Bloomberg.

Seanca legjislative u shty të hënën pasi anëtarët e partisë në pushtet, të cilët kanë një shumicë prej dy të tretave në Senat, nuk u paraqitën në mbledhje.

Parlamenti mund të miratojë përfshirjen e Suedisë në aleancën ushtarake në vjeshtë, tha para gazetarëve ministri i Kabinetit, Gergely Gulyas.

Lexo po ashtu Erdogan: Deri në vjeshtë nuk do të ratifikohet anëtarësimi i Suedisë në NATO

Kujtojmë se Finlanda dhe Suedia aplikuan për anëtarësim në NATO në maj të vitit të kaluar, por Turqia bllokoi procesin e anëtarësimit duke kërkuar që këto vende t’i shpallin organizatat PKK/YPG si terroriste, si dhe ekstradimin e personave të akuzuar për terrorizëm ose përpjekje për grusht shteti në vitin 2016.

Megjithatë Turqia hoqi dorë më pas dhe lejoi anëtarësimin e finlandezëve në aleancën më të madhe ushtarake në botë, ku ceremonia zyrtare për pranimin u mbajt më 4 prill të këtij viti në selinë e organizatës në Bruksel.

Ndryshe, Suedia ka marrë përgjigje pozitive prej hungarezëve dhe turqve në samitin e fundit të NATO-s dhe po pret që këto dy vende të ratifikojnë anëtarësimin e saj në aleancë. /Telegrafi/