Sipas gazetarit të njohur David Ornstein, Al Hilal ka nisur përpjekjet për të transferuar sulmuesin anësor të Arsenalit, Gabriel Martinelli.
Klubi nga Arabia Saudite ka hapur tashmë bisedimet me përfaqësuesit e 25-vjeçarit për një transferim të mundshëm. Deri më tani nuk ka marrëveshje mes palëve, por negociatat janë duke vazhduar dhe Martinelli është i hapur për ta shqyrtuar mundësinë e transferimit.
Arsenali kërkon rreth 60 milionë euro për kartonin e brazilianit, i cili ka kontratë me “Topçinjtë” deri në vitin 2027. Në marrëveshjen e tij ekziston gjithashtu një opsion për zgjatjen e kontratës edhe për një vit tjetër.
E ardhmja e Martinellit ka qenë në qendër të spekulimeve gjatë kësaj vere. Arsenali më herët kishte pranuar një ofertë prej 45 milionë eurosh nga Galatasaray, por kampi i lojtarit i kishte bërë të ditur klubit londinez se braziliani nuk ishte i interesuar për një transferim në Turqi.
Martinelli gjithashtu nuk ishte përfshirë në skuadrat e Arsenalit për dy ndeshjet e para të sezonit, përfshirë fitoren ndaj Manchester Cityt në Community Shield dhe ndeshjen hapëse të Ligës Premier kundër Coventry Cityt.
Arsenali është i gatshëm ta shesë brazilianin në rast se arrin një ofertë që i plotëson kërkesat e klubit, megjithëse vetë Martinelli nuk është duke ushtruar presion për t'u larguar nga “Emirates”.
Sezoni 2025/26 ishte mjaft i ngarkuar për Martinellin, i cili zhvilloi 53 paraqitje, teksa Arsenali fitoi titullin e parë të Ligës Premier që nga sezoni 2003/04 dhe arriti deri në finalen e Ligës së Kampionëve.
Që prej transferimit nga klubi brazilian Ituano në vitin 2019, Martinelli ka regjistruar 278 paraqitje me ekipin e parë të Arsenalit, duke shënuar 62 gola. /Telegrafi/
