Max Kruse është përzënë nga kombëtarja gjermane, pasi trajneri Joachim Low ka vendosur të marrë masa për sjelljen e pahijshme të futbollistit.

Sulmuesi i Wolfsburgut, autor i gjashtë golave këtë sezon në Bundesliga, njihet për karakterin e tij të vështirë dhe ditët e fundit u përfshi në një sherr me një gazetare të “Bild”, e cila po e fotografonte në një diskotekë.

Edhe në tetor Low e la jashtë kombëtares 28-vjeçarin, për shkak se ky kishte kaluar një natë të tërë në kazino, ku kishte fituar 75 mijë eurot, të cilat më pas i harroi në taksi.

“Javën e shkuar i thashë qartësisht Kruses se çfarë pres prej tij, brenda e jashtë fushe. Unë dua që lojtarët e mi të ruajnë përqendrimin te futbolli dhe Kampionati Evropian. Max është sjellë shpesh në mënyrë joprofesionale dhe këtë nuk mund ta pranoj. Kemi objektiva madhor në verë dhe kemi nevojë për lojtarë të përqendruar”, u shpreh Low, në lidhje me këtë çështje.

Pas përjashtimit të Kruses, kombëtarja gjermane do të vazhdojë përgatitjet me 26 lojtarë, për miqësoret e ditëve të ardhshme.