Tifozët në “Signal Iduna Park” shijuan një ndeshje të madhe miqësore mes Gjermanisë dhe Argjentinës, që prodhoi plot katër gola, por asnjë fitues, pasi u mbyll 2-2.
Pjesa e parë u dominua tërësisht nga pancerat, që shënuan fillimisht në minutën e 16’ me anë të sulmuesit Serge Gnabry.
Vetëm 6 minuta më vonë, ky i fundit shërbeu për Havertz, që shënoi edhe golin e dytë (2-0).
Nga ana tjetër, dyshja Lautaro Martinez dhe Paulo Dybala, që shkëlqyen në derbin e Italisë të dielën në mbrëmje, nuk arritën të thyejnë mbrojtjen gjermane dhe portierin Andre Ter Stegen, që ishte nga minuta e parë në portë.
Megjithatë reagimi i amerikano-jugorëve erdhi në pjesën e dytë.
Lionel Scaloni aktivizoi disa futbollistë, ndërsa njëri prej tyre, Lucas Alario gjeti golin e parë për argjentinasit, në minutën e 66’.
Pesë minuta nga fundi, ishte sërish Alario që këtë herë asistoi për sulmuesin e Sevillas, Lucas Ocampo, me këtë të fundit që mposhti Ter Stegenin dhe vulosi e rezultatin përfundimtar 2-2.
Takimi i radhës për Gjermaninë do të jetë për eliminatoret e Euro 2020 përballë Estonisë si mysafir, ndërsa Argjentina do të luajë një takim miqësor ndaj Ekuadorit në Alicante të Spanjës. /Telegrafi/
