Fitorja e tretë radhazi për Chelsean, Potter: Tani është mentaliteti i duhur

Chelsea ka marrë një fitore shumë të rëndësishme në udhëtim te Leicester City me rezultat 1-3.

Ben Chilwell, Kai Havertz dhe Mateo Kovacic realizuan golat në fitoren e madhe të londinezëve në udhëtim.

I lumtur me këtë fitore është shprehur trajneri anglez Graham Potter, i cili ka thënë se mentaliteti i skuadrës është duke u përmirësuar.

“Ishte një nga ato ndeshje ku edhe tifozeria vendase ta vështirëson shumë punën. Megjithatë, jam i lumtur nga lojtarët sepse e menaxhuan më së miri situatën. Nuk ishte një ndeshje e lehtë pavarësisht rezultatit, Leicester pati raste të mira”.

“Vuajtëm paksa, por me kalimin e minutave e morëm veten dhe ishim të vendosur mirë në fushë. Duhet të vazhdojmë me këto paraqitje, në mbrojtje po tregohemi solidë”.

“Kemi pësuar pak dhe mentaliteti është duke u përmirësuar gjithnjë e më shumë. Tre fitore në tre ndeshjet e fundit përfshirë edhe Ligën e Kampionëve është një ndjesi e mirë, sidomos kur bëhet fjalë për nivele të tilla”.

“Dua edhe një fitore tjetër para se të vijë pauza prej kombëtareve. Do të luajmë për tre pikët edhe ndaj Everton”, tha Potter.

Tutje trajneri anglez ka folur edhe për mesfushorin Enzo Fernandez, i cili iu bashkua londinezëve gjatë afatit kalimtar të janarit.

“Enzo Fernandez është i shkëlqyer, jam i bindur se do të rritet edhe më shumë pasi sapo është transferuar në një ambient që është i ri për të. Në fushë Fernandez sheh gjithçka, ka shumë vizion”, deklaroi Potter. /Telegrafi/