Filmi “Adnan Kafazi” në Cineplexx, kasti tregojnë detajet e filmit aksion-komedi që pritet të marrë zemrat e publikut

Të mërkurën në kinemanë ‘Cineplexx’ është mbajtur konferenca për shtyp e kastit të filmit “Adnan Kafazi”.

Regjisori Genc Berisha, producentët dhe aktorët e filmit më të ri të zhanrit komedi/aksion, kanë rrëfyer para gazetarëve historinë e realizimit të filmit dhe sfidat që iu janë paraqitur.

“Jam shumë i kënaqur me rezultatin që kemi arritur dhe me ekipin që kemi pasur, mezi kam pritur që t’ia nis pjesës së tretë, i kemi parë vështirësitë nga filmat e kaluar dhe tani i kemi kaluar shumë më lehtë. Kemi qenë një ekip shumë më i madh edhe mendoj që edhe këta kanë qenë shumë më profesional se herët e kaluar”, ka thënë regjisori Genc Berisha.

Ndërkohë, aktori dhe producenti Besart Sllamniku e bëri të qartë se filmi “Adnan Kafazi” vjen si vazhdimësi e sukseseve të filmave “Zonjusha” dhe “Diamanti”.

“Kur e kemi bërë filmin ‘Zonjusha’ nuk e kemi ditur që do ta bëjmë filmin ‘Diamanti’, por kur e kemi bërë ‘Diamantin’ ne e kemi ditur që do të bëhet ‘Adnan Kafazi’. E kemi ditur edhe sinopsisin dhe ka qenë një plan të cilit nuk kemi arritur ta realizojmë, ky film ka pasur shumë më herët për t’u realizuar, por për shkak të pandemisë është vonuar”, ka rrëfyer Besart Sllamniku.

Ndërsa aktorja Edona Reshitaj e cila luan një prej roleve kryesore në film, tha se është e lumtur që mori pjesë në këtë film të zhanrit komedi/aksion, i cili mbi të gjitha ka në fokus fuqizimin e gruas.

“Fatkeqësisht shoqëria jonë është një shoqëri e cila nuk ka qejf që t’i shfaqë problemet e femrës, sidomos në aspektin, një shoqëri që ka dëshirë ta lërë femrën të heshtë dhe të mos i shfaq problematikat që i ka ajo. Shpresoj që ky film do t’i vetëdijësojë femrat, por me më rëndësi është të vetëdijësohen meshkujt, sepse meshkujt janë problematika pse femrat janë të izoluara dhe nuk mund ta shprehin lirinë e tyre”, ka thënë Reshitaj.

Filmi “Adnan Kafazi” do të jetë i disponueshëm për publikun nga data 2 shkurt në ‘Cineplexx’. /Telegrafi/