FFK ka mbajtur Kuvendin e Punës për vitin 2018, ku u morën disa vendime. Ky kuvend mbahet një herë në vit dhe pasqyron të arriturat e kësaj Federata brenda 12 muajve.
Delegatët kanë votuar për Raportin e Punës dhe Raportin Financiar për vitin 2018 në FFK, Raportin e Garave dhe parashtresa e ankesa dhe vendime të ndryshme.
Në këtë Kuvend, që u mbajt në Hotel “Emerald”, morën pjesë 54 nga 59 delegatë sa ka gjithsej Kuvendi.
Numri një i Federatës së Futbollit të Shqipërisë, Armand Duka, i cili është anëtarë i Komitetit Ekzekutiv të UEFA-s, është i deleguar nga UEFA si vëzhgues në Kuvendin e rregullt të Punës së FFK-së.
Buxheti i vitit 2018
Buxheti i FFK-së për vitin 2018 ka pasur vlerë mbi 11 milionë euro dhe gati 90% e këtyre të hyrave janë nga FIFA dhe UEFA, kurse pak mbi 10% nga të hyrat e FFK-së janë nga sponsorët, dënimet, anëtarësimet, sponsorimet dhe të drejtat televizive.
Pagat e përzgjedhësve dhe shpenzimet në paga e meditje për ekipet Kombëtare mbërrijnë mbi 2 milionë euro. Pjesa më e madhe shkon në ekipin kombëtar A.
Në Kuvendin e Punës së FFK-së, delegatët miratuan raportet financiare dhe ato të punës e të garave të FFK-së pa vërejtje.
Delegati i Trepçës’89, Abedin Zeka ka propozuar pagë për bashkëshorten e ish presidentit të FFK-së Fadil Vokrrit.
FFK miraton pension për bashkëshorten e Fadil Vokrrit, me propozim të Abedin Zekës, delegatit të Trepçës’89. Edhe kuvendi e miratoi kërkesën.
Vendimi u përkrahë nga të gjithë delegatët.
Kuvendi i Punës i Federatës së Futbollit të Kosovës mori vendim që nga sezoni 2020/2021, Superliga të ketë vetëm 10 skuadra.
Një gjë e tillë erdhi për të rritur konkurrencën dhe cilësinë mes skuadrave garuese. Delegatët e kuvendit e votuan njëzëri këtë propozim.
Nga sistemi aktual, dy skuadra do të eliminohen për t’iu përshtatur sistemit të ri nga vjeshta e vitit 2020.
“Të gjitha regjionet dhe të gjitha klubet kanë pranuar që të bëhet Superliga me 10 ekipe”, ka deklaruar për mediat pas Kuvendit, Agim Ademi.
Edhe pse ishte paralajmëruar se mund të ketë mocion për shkarkim të kryetarit të FFK-së, Agim Ademi, një gjë e tillë nuk ka ndodhur.
Vetë Ademi ka thënë se është i lumtur që gjithçka shkoi mirë.
“Përkundër zhurmave jam i lumtur që gjithçka ka shkuar shumë mirë. Faleminderit të gjithë delegatët për përkrahjen”.
“Do të vazhdojmë me punën tonë me krenari. Puna që është bërë deri më tani u vlerësua nga të gjithë”, ka thënë ai.
Ka pasur edhe disa kërkesa nga klubet, por që do të shqyrtohen para nisjes së kampionatit të ardhshëm. /Telegrafi/
