Dele Alli tregon për traumat e jetës – Nga abuzimi seksual në moshën gjashtëvjeçare, te pirja e duhanit, shitja e drogës e deri te pensionimi

Dele Alli ka kaluar kohë të vështira kohëve të fundit. Lojtari ishte një nga yjet e Tottenham Hotspur, por përparimi i tij ka ngecur. Që nga janari i vitit 2022, ai nuk i përket skuadrës londineze, nënshkroi me Everton, klub që e huazoi te Besiktas në ligën turke, ku as aty nuk shkëlqeu. Një dëmtim shkurtoi gjithçka dhe në prill ai u rikthye te Evertoni.

Tani, në një intervistë në The Overlap me Gary Neville, Alli ka pranuar problemet që ka pasur kohët e fundit dhe ka folur për një fëmijëri të tmerrshme me drogën dhe abuzimin seksual.

Alli piu dhe mori pilula gjumi pasi u kthye nga Turqia… Derisa një ditë e kuptoi se nuk ishte në rrugën e duhur dhe kërkoi ndihmë në një qendër rehabilitimi. Një dëshmi rrëqethëse e një futbollisti që përpiqet të kthehet në atë që ishte.

“Kam frikë të flas për këtë. Kur u ktheva nga Turqia dhe kuptova se kisha nevojë për një operacion, isha shumë keq mendërisht dhe vendosa të shkoj në një qendër rehabilitimi të shëndetit mendor. Ata trajtojnë varësitë dhe traumat. E ndjeva se ishte momenti im. Nuk mund të thonë të shkosh, duhet ta dish dhe ta marrësh vetë vendimin përndryshe nuk do të funksionojë”, i shpjegon fillimisht Dele Alli, Gary Nevillet.

Një jetë plot trauma

Lojtari i Everton u hap dhe në intervistë rrëfeu episode shumë të vështira nga fëmijëria e tij.

“Në moshën gjashtë vjeçare, unë u abuzova seksualisht nga një shoqe e nënës sime, e cila rrinte shumë nëpër shtëpi. Nëna ime ishte një alkooliste. Më dërguan në Afrikë për të mësuar disiplinën dhe pastaj më kthyen”.

“Në moshën shtatëvjeçare, fillova të pi duhan; në tetë, fillova të shisja drogë. Një person i moshuar më tha se nuk do ta ndalonin një fëmijë me biçikletë, kështu që unë hipja me topin tim të futbollit dhe më pas mbaja drogën poshtë. Në moshën 11-vjeçare më varën nga një urë, ishte një djalë i lagjes tjetër, një burrë”.

“Në moshën 12-vjeçare më adoptuan një familje e jashtëzakonshme. Nuk mund të kisha kërkuar njerëz më të mirë që të bënin atë që bënë për mua. Nëse Zoti i krijoi njerëzit, ishin ata”.

Dele Alli opening up to @GNev2 on the Overlap about his childhood trauma:

▪️ Sexually abused at 6-years old by his mother's friend
▪️ Starting smoking at 7-years old
▪️ Sent to Africa to learn discipline at 7-years old
▪️ Forced to deal drugs at 8-years old
▪️ Hung off a bridge… pic.twitter.com/qmq7XgCred

— Football Tweet ⚽ (@Football__Tweet) July 13, 2023

Pensionimi

Lojtari i Evertonit, i cili tashmë është 27 vjeç, gjithashtu pranoi në intervistë se ishte gati të tërhiqej pak kohë më parë.

“Një mëngjes u ngrita dhe duhej të shkoja në stërvitje. Mbaj mend që shikoja në pasqyrë dhe pyesja veten nëse mund të tërhiqesha tani. Në moshën 24 vjeç. Të bëja atë që më pëlqente. Për mua ishte zemërthyese. Gjithmonë kam qenë unë kundër vetes në gjithçka. Isha i bllokuar në një cikël të keq dhe në gjëra që po më lëndonin”.

Thirrja e Pochettinos

Një nga njerëzit më të rëndësishëm në karrierën e Allit ka qenë Pochettino. Me trajnerin, ai shkëlqeu te Tottenham. Tani argjentinasi, i cili e di se ish-nxënësi i tij nuk po kalon një kohë të mirë, është i shqetësuar për të.

“Shpresoj të kem kohë ta telefonoj dhe të shoh se si është. Dele është një djalë i mrekullueshëm. Unë dua të flas me të për të zbuluar se çfarë po ndodh. Ai është ende i ri, kështu që mbase mentaliteti i tij mund të ndryshojë. Jam i sigurt se ai do të kthehet”, ka thënë menaxheri i Chelseat.

Dele Alli, nga ana e tij, ka vetëm fjalë të mira për trajnerin argjentinas.

“Pochettino ishte trajneri më i mirë dhe unë nuk mund të kisha kërkuar një menaxher më të mirë në atë kohë. Nuk ishte si një marrëdhënie mes një futbollisti dhe një trajneri. Ishte më e thellë se kaq, e ndjeja. Ai ishte aq i kuptueshëm për vendimet që merrja dhe ai më udhëzonte, sikurse kujdesej për mua si person para futbollit”, përfundoi futbollisti anglez. /Telegrafi/