Bayern Munich ka mposhtur Real Madridin me rezultat 3-1 në ndeshjen e vlefshme për International Champions Cup të zhvilluar mëngjesin e sotëm (e diel).

Bavarezët janë treguar më të fortë se Mbretërit në miqësoren e parë serioze të zhvilluar në NRG Stadium të Houstonit, duke fituar pa shumë vështirësi.

Pjesa e parë e ndeshjes u karakterizua me lojë të barabartë nga të dyja skuadrat, por edhe përkundër rasteve të krijuara vetëm Bayerni gjeti golin.

Goli i vetëm në këtë pjesë erdhi në minutën e 15-të, ku francezi Corentin Tolisso shënoi me lehtësi për 1-0.

Në pjesën e dytë, skuadra e Niko Kovac e nisën furishëm duke shënuar dy gola të shpejt për dy minuta lojë dhe për të trefishuar epërsinë.

Fillimisht ishte Robert Lewandowski (67′), i cili shënoi për 2-0 pas asistimit të Niklas Sule, ndërsa Serge Gnabry (69′) shënoi për 3-0 pas asistimit të Leon Goretzka.

Deri në fund të ndeshjes pati edhe disa raste shënimi nga të dyja skuadrat, por ishin vetëm Mbretërit që ngushtuan epërsinë në 3-1 dhe vulosën rezultatin përfundimtar me anë të Rodrygo Goes, i cili shënoi gol të bukur nga gjuajtja e lirë.

Në ndeshjen e radhës, Bayerni do të luajë me Milanin, ndërsa Real Madridi me Arsenalin. /Telegrafi/