Barcelona ka fituar ndaj Real Betisit me rezultat të thellë 5-2 në ndeshjen e vlefshme për javën e nëntë në La Liga.

Ekipi i Ronald Koeman i është rikthyer fitores pas katër ndeshjeve, duke triumfuar në Camp Nou ndaj Betisit.

Pjesa e parë e ndeshjes u karakterizua me lojë thuajse të barabartë, por me Barcelonën me një nuancë më të mirë, edhe pse dy skuadrat shënuan nga një herë.

Ishin vendasit që gjetën të parët golin duke shënuar me anë të Ousmane Dembele (22’) për 1-0, ndërsa në minutën e 33-të Antoine Griezmann humbi një penallti duke humbur mundësinë të dyfshiojë rezultatin.

Kur pritej që pjesa e parë të mbyllej me barazim në skenë doli Antonio Sanabria (45+3) që shënoi golin e barazimit 1-1.

Në pjesën e dytë, Barcelona ishte superiore ndaj kundërshtarëve kjo edhe për faktin se Lionel Messi u inkuadrua në lojë në minutën e 46-të, ndërsa Betisi mbeti pa Aissa Mandi (60’), i cili u ndëshkua me të kuq.

Barcelona arriti të gjejë golin e parë në këtë pjesë në minutën e 49-të me anë të Griezmann, i cili shënoi për 2-1 nga afërsia, ndërsa Messi (61’) shënoi nga penalltia për 3-1.

Betisi arriti të kthehet në lojë në minutën e 73-të duke shënuar me anë të Loren për 3-2, por në minutën e 82-të Messi gjeti edhe golin e dytë personal duke shënuar një gol të bukur për 4-2 pas një asistimi fantastik me thembër nga Sergi Roberto.

Në minutën e fundit të ndeshjes ishte Pedri që shënoi për 5-2 duke vulosur rezultatin përfundimtar të ndeshjes.

Pas kësaj fitore, Barca renditet në vendin e tetë me 11 pikë, ndërsa Betisi renditet në pozitën e shtatë me 12 pikë.

Në ndeshjen e radhës, Blaugranët luajnë në udhëtim te Atletico Madridit, ndërsa Betisi te Athletic Bilbao. /Telegrafi/