Banorët e zhvendosur të Gazës i përshkruajnë vështirësitë shtesë që ka sjellë dimri

Banorët e zhvendosur të Gazës që kalojnë ditët e tyre në tenda të improvizuara ose të grumbulluar rreth zjarreve në natyrë kanë treguar për vështirësitë shtesë që ka sjellë dimri.

Temperaturat kanë rënë afër zeros në Mesdheun lindor ditët e fundit dhe ka pasur disa stuhi dimërore që kanë kaluar nëpër të, duke sjellë reshje të mëdha shiu në rajon, shkruajnë mediat e huaja, përcjell Telegrafi.

Ayman Jamal, i cili e zhvendosi familjen e tij në Deir al-Balah në Gazan qendrore nga Shujaiya në veri, ka folur për CNN nga brenda tendës së tij.

Muret e saj përbëhen nga “fletë” të hollë najloni të ngjitura në një strukturë prej druri; ka boshllëqe midis mbulesës ku mund të bjerë shiu.

Madje nuk ka asgjë për të ofruar mbrojtje nga toka e lagësht – vetëm tokë e ngjeshur dhe me rërë.

“Mbrëmë ishte jashtëzakonisht ftohtë, ne nuk mund të flinim, duke lëvizur nga një vend në tjetrin brenda tendës”, citohet të ketë thënë ai.

“Shiu dukej se na ndiqte kudo që shkonim”, tha Jamal për CNN. “Fëmijët e mi po ngrinin”.

Në një cep tjetër, 10 fëmijë, të gjithë nën moshën 10 vjeç, u mblodhën rreth një tenxhereje të mbushur me ujë që ngrohej nga një zjarr i thjeshtë me qymyr.

Ata ishin zbathur dhe ngritën duart te avulli për t’u ngrohur.

“Të gjithë jemi të sëmurë dhe askush nuk kujdeset. Nuk kemi asnjë ilaç”, tha njëri prej tyre. “Ne jemi kaq të pistë. Ne nuk kemi bërë dush për një kohë të gjatë. Ju lutemi ndalojeni këtë për pak kohë”.

Kombet e Bashkuara vlerësojnë se pothuajse 90% e popullsisë së Gazës prej më shumë se 2 milionë banorësh janë zhvendosur si pasojë e luftës. /Telegrafi/