“Ajo” e Getit dhe Majkit në versionin bullgar nuk është plagjiaturë, gëzon të drejtat legjitime (Foto/Video)

Kënga “Ajo” nga Getoar Selimi dhe Majk vitin e kaluar ishte një ndër hitet e verës, ndërkohë që ende vazhdon të pëlqehet nga publiku.

Se është e pëlqyeshme dhe lakmohet nga çdokush, këtë e vërteton edhe interesimi i artistëve nga Ballkani, për ta gëzuar vijën melodike të kësaj kënge.

Ky është rasti i dy këngëtarëve bullgarë Boris Dali dhe Elena Velevska, të cilët kanë përdorur vijën melodike të këngës ajo, në një këngë të tyren në bullgarisht, të titulluar “Shte si Moya”.

Lexo po ashtu Të gjitha lajmet nga Estrada Shqiptare

Në shumë prej mediave shqiptare gjatë ditës së sotme (e mërkurë) ka qarkulluar lajmi se bëhet fjalë për një plagjiaturë të këngëtarëve bullgarë, por Telegrafi mëson se nuk është ashtu.

I kontaktuar nga Telegrafi, një ndër producentët e këngës Liberian Selimi, njëkohësisht vëllai i Getit ka mohuar se kënga është vjedhje, pasi e njëjta është e blerë nga bullgarët, dhe gëzon të gjitha të drejtat legjitime.

“Ajo këngë është publikuar në mars të këtij viti dhe nuk është vjedhje e këngës ‘Ajo’ të Getit dhe Majk, pasi gëzon të gjitha të drejtat, dhe autorët e këngës janë të cekur edhe në videon e këngëtarëve bullgarë në YouTube”, ka thënë për Telegrafin, Liberian Selimi, apo i njohur ndryshe si LiBeats.

Të njëjtën gjë kanë pohuar edhe dy protagonistët e këngës, reperët Majk dhe Getoar Selimi.

Përkundër faktit dhe dëshirës për ta pasur një këngë të tillë, duket se Boris dhe Elena nuk gëzojnë suksesin e njëjtë me reperët shqiptarë, pasi prodhimi i tyre ka marrë gati afro një milion klikime në YouTube, ndryshe nga versioni origjinal, i cili numëron mbi 50 milionë. /Telegrafi/