Adriana Matoshi iu reagon ashpër komentuesve që e gjykojnë për lidhjen e saj: Disa prej juve meritojnë të jetojnë si mjerana, dashuria nuk është veç seks

Aktorja e njohur shqiptare, Adriana Matoshi, vendosi që për herë të parë këtë vit t’i futet edhe politikës.

Ajo garoi në zgjedhjet e jashtëzakonshme parlamentare 2021, në krah të Lëvizjes Vetëvendosje me numrin 60.

Megjithëse ende nuk ka një rezultat të certifikuar të zgjedhjeve, sipas burimeve thuhet se aktorja Matoshi i ka siguruar votat e mjaftueshme për një nga ulëset e Kuvendit të Kosovës, si deputete e legjislaturës së ardhshme.

Ajo ka marrë përkrahjen nga shumë kolegë të saj artistë, e një ndër ta edhe humoristi Don Pifqi, i cili me prejardhje vjen nga i njëjti qytet ku edhe Adriana ka lindur, Gjilani.

Satiristi, emri i vërtetë i të cilit është Ramadan Behluli publikoi posterin e aktores në faqen e tij zyrtare në Facebook, duke shpërndarë edhe linkun e profilit të Adrianës, me mbishkrimin “Urime Adriana Matoshi”.

E me të parë këtë, aktorja ka falënderuar humoristin për mbështetjen e dhënë, por nuk ka kursyer një përgjigje të ashpër për shumë nga komentuesit, që e paragjykojnë atë për lidhjen me futbollistin afrikan, Keith Groeneveld.

“Njerëzit si disa nga komentuesi meritojnë të jetojnë si mjerana, qashtu qysh e kanë shpirtin! Dashuria nuk është veç seks o gubana, po ajo që juve iu mungon më së shumti, ajo që ju dhemb e përflitni! Mjer ju për shpirtrat e zi që i keni, qysh s’ju vjen turp prej Zotit? Zoti na ka krijuar, Zoti na gjykon, e juve Zoti shpirtrat e zi jua bëftë të bardhë, se badihava që lëkurën e keni të bardhë e të zdralaftë deri në qiell! Faleminderit Dan për përkrahjen, ke qenë i drejtë gjithë e të pafsha gjithmonë kështu me zemër të madhe”, ka theksuar Matoshi në komentin e saj.

Kujtojmë që ajo e bëri publike lidhjen e saj në tetor të vitit të kaluar, duke sfiduar paragjykimet racore që shquhen në Kosovë për lidhje të tilla. /Telegrafi/