Tre filma nga Kosova pjesë e Festivalit të Filmit në Sarajevë

Qendra Kinematografike e Kosovës po vazhdon suksesshëm depërtimin në arenën ndërkombëtare të filmit.

Së fundmi, tre filma të tjerë nga Kosova janë bërë pjesë e Festivalit të Filmit në Sarajevë.

Filmi “Fran and Verka: or a usual day in an abandoned village”, u dha premierë në edicionin e 29-të të festivalit.

Ndërkohë, në ditët në vazhdim do të shfaqen edhe një film bashkëprodhim dhe një zhvillim skenari.

Kështu ka njoftuar Ministria e Kulturës, Rinisë dhe Sportit në një postim në llogarinë zyrtare në Facebook.

Më poshtë postimi i plotë i MKRS-së:

3 filma kosovarë në Festivalin e Filmit në Sarajevë

Qendra Kinematografike e Kosovës po vazhdon fuqishëm prezencën e saj nëpër botë me filmat më të ri që i ka mbështetur.

Premiera botërore e filmit “Fran and Verka: or a usual day in an abandoned village” u dha në edicionin e 29-të të Festivalit të Filmit në Sarajevë, ku ditëve në vijim do të shfaqen edhe 1 film bashkëprodhim dhe 1 zhvillim skenari.

Përkrahur nga QKK, dokumentari i metrazhit të shkurtër shpalos tregimin e Franit dhe Verkës, një çift kroat nga Kosova, të cilët janë banorët e vetëm të fshatit Vërnakollë. Përmes dokumentimit të një dite të çiftit, dokumentari na fton të rimendojmë ndjenjat e vetmisë, përkatësisë dhe lidhjes me vendin që e quajmë shtëpi.

Regjisori Sovran Nrecaj, producentja Aurela Kadriu dhe drejtori i fotografisë Besim Ugzmajli, ishin të pranishëm në premierë, pas së cilës ju përgjigjën pyetjeve të audiencës në një sesion diskutimi.

/Telegrafi/