I tha kryetarit të partisë së tij “mos mashtro”, kryetari i Istogut i reagon zv.ministrit Durmishi

Kryetari i Komunës së Istogut, Ilir Ferati, i ka reaguar zëvendësministrit të Infrastrukturës Hysen Durmishi, rreth rrugës në Bjeshkët e Moknës, pasi ky i fundit tha se ky është projekt i Ministrisë së Infrastrukturës dhe jo i komunës, siç e prezantoi kryetari i LDK-së, Lumir Abdixhiku.

Durmishi, duke reaguar ndaj një postimi të kreut të LDK-së, përmes një postimi në Facebook, kishte thënë “Lumir mos mashtro! Që në mëngjes, nga Istogu, e nise ditën me mashtrime. Rruga e Moknës nuk është projekt lokal por komplet investim i ministrisë tonë”.

Ndaj, këtij reagim është kundërpërgjigjur kreu i Istogut, Ilir Ferati duke i thënë zv/ministrit Durmishi se komuna e tij mund t’i ligjërojë nivelit qendror se si punohet.

“Faza e II-të e projektit ‘Ndërtimi i rrugës, Istog – Bjeshka e Moknes’. Jashtëzakonisht krenarë që përmes kësaj rruge po hapim shtigje të reja drejt zhvillimit të turizmit dhe ekonomisë në gjithë Kosovën. Ps: Për Durmishin&Co, Projekti Mokna i projektuar nga Komuna, mbikëqyrja e menaxhimi nga Komuna, procedurat e prokurimit që Komuna e Istogut bën për dallim prej jush rezultojnë në ekzekutim të shkëlqyeshëm në teren! Të gatshëm jemi kurdo për t’ju ligjëruar se si punohet! Fondet janë të taksapaguesve ( jo te VV-së) dhe tek ta po kthehen si zhvillim e përparësi!”, ka shkruar Ferati, transmeton Telegrafi.

Ndryshe, kryetari i Lidhjes Demokratike të Kosovës, Lumir Abdixhiku, përmes një postimi në Facebook, kishte lavdëruar punën që po e bën kryetari i Istogut, Ilir Ferati.

Abdixhiku ka shkruar për rrugën që po bëhet për në bjeshkën e Moknës, duke shtuar se vendi ynë ka nevojë për projekte të tilla, transmeton Telegrafi./Telegrafi/