Sonte El Clasico i basketbollit kosovar, Trepça – Prishtina

Superliga e Kosovës në basketboll, vazhdon këtë fundjave me ndeshjet e javës së pestë.

Kjo xhiro sjell përballjen e rivalëve të vjetër, Trepçës dhe Prishtinës, sfidë kjo që do të luhet të dielën në “Minatori” të Mitrovicës prej orës 18:00.

Ballafaqimet mes këtyre dy skuadrave gjithnjë janë përshkruar më rivalitet të madh e përcjellur me atmosferë fantastike.

Një ndeshje e tillë parashikohet të jetë edhe të dielën mbrëma në duelin e këtyre dy skuadrave të mëdha.

Trepça së fundi është mposhtur nga Bashkimi në kuadër të xhiros së pestë të elitës së basketbollit kosovar dhe do të bëjë përpjekje që të përmirësoj bilancin e saj në renditjen tabelare, kurse Sigal Prishtina vjen prej një humbje, ku është mposhtur nga ekipi rus, Enisey dhe atë vetëm pas vazhdimeve.

Kjo është një arsye më shumë për “bardhekaltrit”, që me një fitore të mundshme të kërkojnë rikuperimin dhe rikthimin tek rezultatet e mira.

Ndërkaq, Peja të shtunën në “Karagaçi” pret Vëllaznimin, sfidë në të cilën pejanët llogaritën favorit.

Bashkimi i shkon Rahovecit në duelin e vështirë, pas fitores ndaj Trepçës ditë më parë. /Telegrafi/