Shqipëria pa njërin nga liderët ndaj Polonisë, Gjimshiti mungon për shkak të lëndimit

Berat Gjimshiti nuk do të jetë pjesë e Shqipërisë për ndeshjen e datës 27 mars në udhëtim ndaj Polonisë, një sfidë e vlefshme për kualifikueset e ‘Euro 2024’.

Mbrojtësi i kombëtares ishte i pafat në ndeshjen e fundit të Atalantas ndaj Napolit në Serie A, teksa u detyrua të zëvendësohej në minutën e 44-të pas një problemi muskulor.

Pas testeve të fundit, rezulton se Gjimshiti ka pësuar një tërheqje të gradës së parë në muskujt e kofshës së majtë me kohën e rikuperimit që shkon të paktën deri në dy javë.

Kështu, 30-vjeçari humb ndeshjen ndaj Empolit ndërsa është i detyruar të qëndrojë edhe larg grumbullimit të kombëtares, i pari nën drejtimin e trajnerit të ri Sylvinho – transmeton SuperSport.

Lexo po ashtu Gjimshiti i lënduar, te Shqipëria në ethe nëse do ta kenë për grumbullimin e muajit mars

Fat i keq për Gjimshitin dhe për kombëtaren duke parë rëndësinë, por edhe shkallën e vështirësisë së ndeshjes kualifikuese përballë Polonisë.

Ndërkohë, pritet që mbrojtësi t’u rikthehet fushave të blerta vetëm pas pauzës së kombëtares për të dhënë kontributin e tij në pjesën e mbetur të sezonit me fanellën e Atalantas.