SHBA, Koreja e Jugut dhe Japonia të shqetësuara për aktivitetet ‘keqdashëse’ kibernetike të Koresë së Veriut

Shtetet e Bashkuara të Amerikës, Koreja e Jugut dhe Japonia kanë shprehur shqetësimin e tyre në lidhje me aktivitetet “keqdashëse” kibernetike të Koresë së Veriut, të cilat u përdorën për mbështetjen e programeve të tyre të armëve. Këtë e bënë nëpërmjet disa komenteve të lëshuara nga një deklaratë e përbashkët gjatë së premtes.

Fondet e kripto-valutave të vjedhura nga hakerët e Koresë së Veriut kanë qenë një burim kyç për financimin e programeve të armatimit të vendit të goditur nga sanksionet, thonë zyrtarët dhe ekspertët në Shtetet e Bashkuara dhe aleatët e saj.

Një raport i lëshuar me 6 prill nga Departamenti Amerikan i Thesarit bënë të ditur se akter sikurse Koreja e Veriut, po përdornin financa të decentralizuara (DeFi) – një segment ky në ngritje në sektorin e kriptos – për të transferuar dhe shpërlarë të ardhurat e tyre joligjore, raporton Reuters, përcjell Telegrafi.

Koreja e Veriut i ka mohuar akuzat mbi hakimet dhe sulmet e tjera kibernetike. Në mesin e rritjes së kërcënimeve nukleare dhe raketore të Koresë së Veriut, i dërguari i Koresë së Jugut, ka mbajtur bisedime me homologët e tij amerikan dhe japonez në Seul gjatë kësaj jave dhe ka dënuar testet e armatimit nga vendi i izoluar.

“Ne përsërisim me shqetësim se punonjësit e IT jashtë shtetit të RPDK-së vazhdojnë të përdorin identitete dhe kombësi të falsifikuara për t’iu shmangur sanksioneve të OKB-së dhe për të mbledhur fonde për programet e raketave”, thuhej në deklaratën e përbashkët të të dërguarve, duke përdorur akronimin për emrin zyrtar të Koresë së Veriut.

Ata u bënë thirrje vendeve anëtare të Organizatës së Kombeve të Bashkuara që të respektojnë rezolutat e Këshillit të Sigurisë së OKB-së për të riatdhesuar punëtorët koreano-veriorë.

“Ne jemi gjithashtu thellësisht të shqetësuar për mënyrën se si DPRK-ja i mbështet këto programe duke vjedhur dhe pastruar fonde, si dhe duke mbledhur informacione përmes aktiviteteve të dëmshme kibernetike”, vazhdonte tutje deklarata. /Telegrafi/