Rruga më e ‘rrezikshme’ në botë është në Turqi – a do të pranonit të vozitnit këtu

Rruga D915 është e gjatë 105 kilometra dhe lidh qytetet turke, Of dhe Bayburt – konsiderohet si ndër rrugët më të rrezikshme në botë.

Ky titull jozyrtar mbahej për shumë vite nga rruga boliviane Jungas, e njohur edhe si “rruga e vdekjes”, kujton Oddity Central.

D915 lidh Anadollin veri-lindore me Detin e Zi ndërsa ka kthesa të shumta dhe zbritje të rrezikshme, ndaj është një sfidë edhe për shoferët më të aftë.

Historia e saj daton që nga Lufta e Trabzonit (1916-1918), e cila rezultoi në pushtimin e qytetit nga forcat ruse pas një konflikti me Perandorinë Osmane.

Rruga dyshohet se është ndërtuar nga ushtarë rusë duke përdorur vetëm mjete dore. Disa pjesë u shtruan me asfalt, por pjesa më e madhe ka ende zhavorr.

Në fillim, D915 nuk duket e rrezikshme, por ndërsa përparoni, asfalti zëvendëson zhavorrin dhe rruga bëhet më e ngushtë dhe më e pjerrët. Ka 38 kthesa të mprehta, më të famshmet janë të ashtuquajturat kthesa “Derebası”.

Janë gjithsej 17 të tilla në një shtrirje prej 5,1 kilometrash, nga lartësia 1712 metra deri në 2035 metra, me një pjerrësi prej 17 për qind.

Nuk ka mbrojtëse për të parandaluar rënien e automjeteve në luginë, dhe pjesët më të thepisura janë aq të ngushta sa dy automjete nuk mund të kalojnë njëra-tjetrën.

Kjo rrugë është veçanërisht e rrezikshme në kushtet e këqija të motit, si mjegulla e dendur ose shiu, të cilat janë gjithashtu të zakonshme në verë. Meqenëse bora dhe akulli do ta bënin D915 shumë të rrezikshme për të manovruar, ai zakonisht mbyllet midis muajit tetor dhe fundit të qershorit/fillimit të korrikut.

Ndërsa shkon drejt majës së malit, D915 ofron pamje të jashtëzakonshme, por nuk rekomandohet si një atraksion turistik për shkak të natyrës sfiduese.

Një manovër e gabuar mund të përfundojë në tragjedi dhe nuk është e përshtatshme për kërkuesit e adrenalinës. /Telegrafi/