Rizvanolli: Jemi duke ndjekur situatën në Deçan, kemi kontakt të vazhdueshëm me ‘Hidrodrinin’

Për rastin e fundit të helmimit të qytetarëve me ujë në Deçan, ministrja e Ekonomisë, Artane Rizvanolli theksoi se janë në kontakt të vazhdueshëm me ndërmarrjen “Hidrodrini” lidhur me gjendjen e krijuar këto ditë atje.

Rizvanolli gjatë raportimit në Komisionin për Ekonomi, duke iu përgjigjur kryetarit të Komisionit për atë çka ka ndodhur me rreth 900 qytetarë, theksoi se nesër do të vizitojnë ndërmarrjen “Hidrodrini” për të parë nga afër lëshimet e mundshme që mund të kenë ndodhur dhe çuar deri te helmimi i qytetarëve.

Gjatë raportimit për planin e punës, ajo theksoi se prioritet dhe qëllim i ministrisë mbetet krijimi i kushteve për zhvillim të qëndrueshëm ekonomik përmes zhvillimit të teknologjisë së informacionit dhe energjisë së pastër.

Lexo po ashtu Shpallet gjendje emergjente në Deçan

Rizvanolli vuri theksin për sfidat e kësaj ministrie dhe të qeverisë lidhur me gjendjen e rëndë të disa ndërmarrjeve publike.

Derisa, për shërbimet e ujit në veri të Mitrovicës, ajo theksoi se kjo është një sfidë e krijuar tash e mbi 20 vjet.

Ajo duke iu përgjigjur kryetarit të komisionit Ferat Shala, theksoi se në vitin e ardhshëm do të bëhet dekominsionimi i pjesëve jo funksionale të TC “Kosova A”.

Lexo po ashtu Rikthehet furnizimi me ujë në fshatrat e Deçanit, “Hidrodrini” apelon të mos përdoret për pije

Për këto dekomisionime, kryetari Shala theksoi se nevojitet një studim të fizibilitetit nëse mbështet kjo nga IPA III, dhe nuk ka përgatitje për këtë çështje.

Shala ka ngritur edhe çështjen e fondit të MCC deri 200 milionë euro lidhur me eficiencën e energjisë.

Ndërsa, ministrja theksoi se ky fond nuk parashihet për këtë sektor, por për gazin dhe subvencionimin e sektorit privat. /KP/Telegrafi/