Osimhen i vendos ultimatum Juventusit

Victor Osimhen mbetet objektivi kryesor i Juventusit në sulm, por Zonja e Vjetër duhet së pari të shesë Dusan Vlahovic dhe më pas të bindë Napolin të shesë yllin nigerian, ndoshta para mesit të korrikut.

Sulmuesi nën pronësi të Napolit, mbetet prioriteti i transferimeve të Juventusit në sulm, por Bianconerët duhet të kapërcejnë disa pengesa për të arritur marrëveshjen.

Reprezentuesi nigerian ka refuzuar tashmë një ofertë prej 30 milionë eurosh në vit nga Al-Hilal dhe është i hapur për të vazhduar karrierën e tij në Serie A në sezonin 2025/26.

Juventusi mbetet një nga klubet e interesuara, edhe pas largimit të Cristiano Giuntolit dhe emërimit të Damien Comollit si Drejtori i ri i Përgjithshëm.

Lexo po ashtu Gjiganti i Serie A rifillon bisedimet me Osimhenin

Osimhen ka një klauzolë prej 75 milionë eurosh në kontratën e tij me Napolin, por ajo nuk është e vlefshme për klubet e Serie A. Kjo do të thotë që Juventusi do të duhet të negociojë një tarifë transferimi me Aurelio De Laurentiis, presidentin e Napolit.

Një tjetër pengesë lind nga Vlahovic, i cili  nuk është i gatshëm t’i bashkohet Fenerbahces dhe është duke pritur oferta nga klubet më të mira evropiane, me vetëm një vit të mbetur në  kontratën e tij në Allianz Stadium.

Sipas Gazzetta dello Sport, Osimhen është ende i hapur për t’u bashkuar me Juventusin, por nuk do të presë shumë gjatë për të zgjedhur një klub të ri. Nigeriani ka të ngjarë të presë deri në mesin e korrikut përpara se të vendosë për destinacionin e tij të radhës.

Gazeta italiane pretendon se Galatasaray ende shpreson të nënshkruajë me Osimhenin përgjithmonë, por edhe Al-Hilal mbetet i interesuar, ashtu si PSG dhe disa klube të Ligës Premier. /Telegrafi/