Ndalohen tre persona në Pejë, tentuan të kryenin grabitje

Tre persona janë ndaluar me urdhër të Prokurorit të Shtetit nga Departamenti i Krimeve të Rënda në Pejë.

Lajmin për Telegrafin e ka konfirmuar zëdhënësi i Prokurorisë në Pejë, Shkodran Nikçi.

Nikçi ka bërë të ditur se të njëjtit janë ndaluar nën dyshimin se kishin për të kryer veprën penale “Bashkim kriminal në kryerjen e veprës penale të grabitjes”.

“Dy nga të dyshuarit janë shtetas të Shqipërisë ndërsa njëri shtetas i Kosovës. Prokurori i çështjes ka bërë kërkesë në gjykatën kompetente për sigurimin e të pandehurve në procedurë penale”, ka thënë Nikçi.

Nikçi ka shtuar se parandalimi i kryerjes së kësaj vepre penale ka ardhur si rezultat i veprime hetimore disa ditore në mes Prokurorit të Shtetit dhe Policisë së Kosovës.

Për rastin në fjalë ka njoftuar edhe Policia e Kosovës përmes raportit 24 orësh.

“Gjatë kontrollit në dy lokacione të ndryshme janë arrestuar tre të dyshuar meshkuj shqiptar nën dyshimin se të njëjtit në bashkëveprim kanë kryer veprën penale të lartcekur. Pas intervistimit tre të dyshuarit me vendim të Prokurorit, janë dërguar në mbajtje, rasti në procedurë hetimore”, thuhet në raportin e policisë.

Më tej policia përmes një komunikate ka bërë të ditur inicialet e të arrestuarëve.

“Njëri nga personat e dyshuar me inicialet F. G. është shtetas i Republikës së Kosovës ndërsa dy të dyshuarit tjerë me inicialet S. M. dhe M. B. janë shtetas të Republikës së Shqipërisë. Personat e dyshuar të arrestuar janë marrë në pyetje nga Policia e Kosovës ndërsa me vendim të Prokurorit të Shtetit, tre personat e dyshuarit janë ndalur në mbajtje për 48 orë”, thuhej në njoftim./Telegrafi/