Jose Mourinho do t’i monitorojë ngushtë gjashtë lojtarë të Romës në ndeshjen e sotme (e mërkurë) kundër Interit – njofton La Gazzetta dello Sport.

Strategu portugez do ta shikojë në televizor në banesën e tij në Londër duelin ndërmjet ish-ekipit të tij dhe skuadrës së ardhshme.

Ai do të udhëtojë drejt Italisë pas përfundimit të sezonit për ta respektuar trajnerin e tanishëm të Giallorossëve, Paulo Fonseca.

Porse, Mourinho veçmë është duke i bërë planet e tij se si mund të luajë Roma në sezonin e ardhshëm.

(Foto: Instagram/josemourinho)

Sulmuesi Edin Dzeko është i pari që do të monitorohet nga trajneri, pasi portugezi beson se boshnjaku mund të luajë më mirë nën urdhrat e tij.

Henrikh Mkhitaryan nuk ka pasur raporte shumë të mira me Mourinhon te Manchester Unitedi, ashtu që dëshiron të dijë nëse strategu ka ndërruar mendje për të.

Pedro Rodriguez ka qenë një tjetër lojtar që ka punuar nën urdhrat portugezit (te Chelsea) dhe shpreson të vazhdojë të jetë pjesë e Giallorossëve në edicionin e ri.

Rick Karsdorp dëshiron t’i dëshmojë trajnerit të ri se mund të jetë në formacionin bazë në krahun e djathtë nën urdhrat e tij.

E njëjta vlen edhe për Bryan Cristante dhe Ebrima Darboe, të cilat duan të kenë ndikim më të madh në skuadër në sezonin e ardhshëm. /Telegrafi/