Motrat Bush u dërgojnë letër vajzave Obama (Video)

Derisa Sasha dhe Malia Obama po përgatiten të largohen nga Shtëpia e Bardhë, pas tetë vitesh qëndrimi atje, Jenna Bush Hager dhe Barbara Bush, u kanë shkruar atyre një letër me këshilla.

Ashtu si edhe vajzat Obama, motrat Bush kaluan një pjesë të madhe të viteve të tyre të formimit, në Shtëpinë e Bardhë. Kur gjyshi i tyre George H. W. Bush, bëri betimin si presidenti i 41-të i SHBA-ve (në vitin 1989), binjaket Bush ishin vetëm shtatëvjeçare.

E kur babai u betua si presidenti i 43-të në vitin 2001, ato ishin 19 vjeçare. Ndaj, kur Barack Obama u ul në detyrë në vitin 2009, vajzat e para në largim kishin vite këshilla për të ndarë, dhe këtë e bënë në një letër që lexuan në Today Show.

Tani, ndërsa koha e Obama-ve në Shtëpinë e Bardhë po mbaron, binjaket Bush kanë edhe disa këshilla të tjera. Letra, që është publikuar nga Time, u dedikohet viteve që vajzat Obama kaluan në Shtëpinë e Bardhë dhe mënyrës së si ato u rritën gjatë kësaj kohe.

“Në tetë vite ju keni bërë shumë. Keni parë shumë. Keni qëndruar në portat e ishullit Robben, ku Nelson Mandela qëndroi i burgosur për dekada, keni udhëtuar në Liberi e Marok, keni folur me vajzat atje për rëndësinë e edukimit, vajza që te ju shihnin veten, që te ju shihnin se kush mund të bëheshin nëse vazhdonin të mësonin”, thuhet mes tjerash në letër, transmeton TCH.

Derisa në letrën e vitin 2009, motrat Bush i këshillonin vajzat Obama për atë që duhej të bënin, të shikonin dhe të arrinin gjatë qëndrimit të tyre në Shtëpinë e Bardhë – letra e fundit ka një ton të ndryshëm, pasi shikon tek e ardhmja e motrave Obama si ish-vajza të para dhe si gra të pjekura.

“Tani, do t’i bashkoheni një tjetër klubi të rafinuar, atij të fëmijëve të parë, një pozicion që nuk e keni kërkuar dhe që nuk ka rregulla të shkruara. Por, keni shumë për të bërë, do shkruani historitë e jetëve tuaja, përtej hijes së prindërve të famshëm, e në çdo hap, do të mbani me vete eksperiencat e tetë viteve të kaluara”, thuhet më tej.

Motrat Bush, tashmë 35-vjeçare, vazhdojnë më tej duke përdorur edhe nota humori: “Gëzohuni kolege, tani nuk keni pse ta ndjeni më peshën e fjalës. Eksploroni pasionet tuaja. Mësoni kush jeni, bëni edhe gabime, tani ju lejohet…”.

Motrat Bush, që kanë mbështetur Obama-t qëkur Sasha dhe Malia ishin shtatë dhe dhjetë vjeçe, kanë edhe një kujtesë të fundit: “Ju qëndruat në këmbë kur prindërit shfaqeshin në faqet e para të gazetave. Prindërit tuaj ju vunë ju të parat e jo vetëm jua treguan, por edhe jua dhanë botën. Si gjithmonë, ata do të jenë pranë jush, edhe në këtë kapitull të ri. Po kështu edhe ne…”.