Messi konfirmon të ardhmen e tij: Më pëlqen Parisi më shumë se Barcelona

Deri në ditën kur Lionel Messi të pensionohet, duket se gjithmonë do të ketë zëra që e lidhin atë me një rikthim te ish-skuadra e tij, Barcelona.

Askush nuk e imagjinonte kurrë të shihte argjentinasin të largohej nga Blaugranët, duke pasur parasysh kohën që kaloi atje, derisa u transferua në Francë. Messi aktualisht është nën kontratë me Paris Saint-German deri më 30 qershor 2023, dhe atëherë ai do të duhet të marrë një vendim nëse dëshiron të rinovojë kontratën apo ta çojë karrierën e tij në një drejtim të ri.

Në një bisedë me ish-bashkëlojtarin e tij të kombëtares, Ezequiel Lavezzi, Messi dha disa sugjerime se çfarë mund të presë e ardhmja për të. Ai e di se dyert janë më se të hapura si në Camp Nou ashtu edhe në Parc des Princes, pasi ekipi francez do të bëjë gjithçka që mundet për të rinovuar marrëveshjen e tij.

“Ishte e vështirë të largohesha nga Barcelona, kishim kaluar gjithë jetën në të njëjtin vend. Kurrë nuk kisha lëvizur dhe nuk e dija se si ishte të largoheshe”, ka thënë fillimisht Messi.

“Nuk e prisja këtë, ndodhi shumë shpejt dhe më duhej të largohesha nga Barcelona brenda natës”.

“Ne e gjetëm veten në një mjedis të ri. Kishim jetën tonë në Barcelonë, miqtë, zakonet tona dhe ishim në një vend tjetër, me një gjuhë tjetër, me një lloj tjetër futbolli, me një tjetër klimë. Ishte e vështirë, por, sot, më pëlqen gjithçka, përfshirë futbollin”.

Megjithatë, kur bëhet fjalë për një rikthim të mundshëm te Barcelona, ​​duket se Messi është më i interesuar të qëndrojë në Francë.

“Parisi më pëlqen shumë më tepër, eksploroj qytetin dhe e shoh të mrekullueshëm. Gjatë vitit tim të parë pati një ndryshim të madh, gjërat ndodhën shumë papritur. Nuk ishte qëllimi im të largohesha nga Barcelona dhe gjithçka ishte e papritur”.

“Pas kësaj periudhe të gjatë dhe disa momenteve të vështira, jam i lumtur që jetoj aty ku jetoj dhe unë dhe familja ime po shijojmë Parisin”, përfundoi ylli argjentinas. /Telegrafi/