“Kor kukuvajkash nga Beogradi”, Fetoshi godet propagandën serbe pas dënimit për dhunë ndaj gazetarëve

Drejtori i Institutit “Oktopus”, Arben Fetoshi, ka kritikuar ashpër reagimet nga Serbia dhe siç i ka quajtur ai ‘megafonët e saj në Kosovë’, pas dënimit të Ivan Mrkiq, nga Gjykata Themelore në Mitrovicë, me një vit e pesë muaj burg për dhunë ndaj gazetarëve në veri të vendit.

Sipas Fetoshit, reagimet që e paraqesin Mrkiqin si “viktimë të përndjekjes” janë pjesë e një formule të njohur propagandistike që Serbia ka ndërtuar ndër vite.

“Reagimet nga Serbia, si dhe nga megafonët e saj në Kosovë, ashtu siç tashmë është bërë rutinë – një kor ‘kukuvajkash’ për dënimin si një ‘shembull tjetër i dhunës dhe përndjekjes së serbëve’. Vetëm një manipulim narcist e mbron dhunuesin si viktimë, kurse dënimin e tij e cilëson ‘përndjekje’”, ka shkruar Fetoshi.

Ai ka thënë se dënimi i Mrkiq me 1 vit e 5 muaj është pak, pasi siç ka thënë “Dhunimi i ekipeve të medies është sulm brutal mbi lirinë dhe agresion për ta privuar të vërtetën”.

“Gazetarët dhe mediat e Kosovës janë penguar vazhdimisht në veri, si ky rast i ekipit të ‘Insajderit’ apo sulmet e tjera ndaj personelit, pajisjeve e pronës, jo për shkak të tensioneve, por për shkak të frikës nga e vërteta, për shkak të demaskimit e denoncimit të formulës mashtruese të ‘agresorit viktimë’. Mrkiq nuk është dënuar si serb, por si agresor. ‘Viktima’ e tij është gazetar, është medie, është përkushtimi ndaj të VËRTETËS, që ende tentohet të mbahet peng nga strukturat paralele, bandat dhe retorika nxitëse e Beogradit”, ka shtuar Fetoshi./Telegrafi/